Home Notisia ADTL, RHTO, CGT ho Oxfam Nota Katak OJE 2023 Seidauk Responde Nesesidade...

ADTL, RHTO, CGT ho Oxfam Nota Katak OJE 2023 Seidauk Responde Nesesidade EhD nian Ho Adekuadu

492
0
Ekipa konjuta ba advokasia konaba direitu ema ho defiensia hasae foto hamutuk ho Ministru Obras Publika, Abel Pires. [Foto: Zevonia | 27.10.2022]

Reportajen Zevonia Vieira

“Ministériu importante sira hanesan Ministériu Justisa, Ministériu Saúde, Ministériu Edukasaun no Ministériu Obras públikas orsamentu ne’ebé Ministériu hirak ne’e aloka kiik tebes”.

Oxfam iha Timor-Leste hamutuk ho Asosiasaun Defisiénsia Timor-Leste (ADTL), Ra’eas Hadomi Timor Oan (RHTO), Core Group Transparency (CGT) no grupu promotor ne’ebe durante ne’e halo adovokasia no influensia ba asuntu Orsamentu inkluzivu ba direitu ema iha defiensia iha Timor-Leste liuhusi projetu Open the Books, aprosima no enkoraja governu hodi harii infraestrutura ne’ebe asesivel ba Ema ho Defisiénsia (EhD).

Liuhusi submisaun ne’ebe hatama Parlamentu Nasional iha ambitu debate Orsamentu Jeral Estadu 2023, hodi hare tau importánsia ba situasaun ema ne’ebe moris ho kondisaun, hanesan Ema ho Defisiensia tanba to’o oras nee, nafatin sai grupu ida ne’ebé mak vulneravel liu iha ita nia sosiedade.

Tuir relatóriu Sensu Populasaun 2015 hatudu katak mais ou menus ema hamutuk 38,118 inklui (mane hamutuk ema 20,140) no (feto hamutuk ema 17,978) mak sai nu’udár Ema ho Defisiénsia[1] iha Timor-Leste. Dala barak Ema ho Defisiénsia sira ne’e kontinua tama iha kategoria ema ne’ebé kiak no marjinalizadu liu iha sosiedade sira-nia leet. Aleinde ne’e, EhD sira mós hasoru diskriminasaun no difikuldade oi-oin iha sira nia moris. Ezemplu RhD sira nia partisipasaun minimum tebes iha aspetu espasu síviku no asesibilidade ba edukasaun, asesibilidade ba formasaun vokasionál, asesibilidade ba oportunidade servisu. Aleinde ne’e sira mós dala barak esklui iha atendimentu servisu públiku sira.

Nune’e liuhusi submisaun konjuta ne’ebe Neon Metin asesu, nota katak proposata Orsamentu Jeral Estadu (OJE) 2023 no Planu Asaun Annual husi kada Ministeriu xave sira nian, liu-liu Ministériu Justisa, Ministériu Saude, Ministeriu Edukasaun no Ministériu Obras Publika seidauk aloka orsamentu ne’ebé adekuadu, atu responde ba nesesidade Ema ho Defisiénsia sira nian iha Timor-Leste. Maske ami rekoñese katak governu daudaun ne’e estabelese ona Planu Asaun Nasional ba Ema ho Defisiénsia, no foin lalais iha fulan Jullu estadu Timor-Leste fó sira nia apoiu polítika no kria dekretu lei rua ne’ebé lori ita ba ratifikasaun Konvensaun Internasionál kona ba Direitu Ema ho Defisiénsia sira nian iha Timor-Leste.

Alende ne’e nota mos katak iha Planu Asaun Nasional ba Ema ho Defisiénsia iha kada Ministériu no Sekretáriu Estadu identifika programa prioridade balun atu responde ba nesesidade Ema ho Defisiénsia ninian, infelizmente programa hirak ne’e ladún hetan prioridade iha governu nia Orsamentu 2023 nian, maske Ministériu importante sira hanesan Ministériu Justisa, Ministériu Saúde, Ministériu Edukasaun no Ministériu Obras públikas orsamentu ne’ebé Ministériu hirak ne’e aloka kiik tebes.

Ba preokupasaun hirak ne’e liuhusi submisaun konjuta ne’e, organizasaun sira ne’ebe halo advokasia ba orsamentu inkluzivu no direitu ema ho defisiénsia nian, husu membru Parlamentu sira atu husu ba governu, hodi asegura implementasaun Planu Asaun Nasional Ema ho Defisiénsia 2021-2030, liu husi kria planu no halo investimentu orsamentu ne’ebé adekuadu iha orsamentu kada tinan ninian hodi sensivel no inkluzivu liu tan, partikulármente iha Orsamentu Jerál estadu 2023 nian.

Husu ba deputadu/a sira nu’udar reprezentante povu, atu haree ho kuidadu no matenek ba proposta Orsamentu Jerál Estadu 2023 ninian no planu asaun annual governu nian ne’ebé mak sira aprezenta atu bele konsidera asuntu inkluzaun sai parte prioridade ida nune’e labele sai fali obstákulu ba implementasaun Konvensaun Internasionál kona ba Direitu Ema ho Defisiénsia no rezolusaun sira ne’ebé estadu no Governu komprimitidu no aprova ona.

Husu Parlamentu Nasional atu husu governu hodi aloka Orsamentu Estadu ne’ebé espesífiku ba Ministériu Edukasaun, hodi bele responde ba nesesidade Ema ho Defisiénsia sira nian hodi hola material no ekipamentu sira ne’ebé bele fasilita estudante no manorin sira iha eskola kona ba oinsá halo interpretasaun ba lian jestual no mós letra braile nian.

Husu Ministériu Edukasaun atu aloka Orsamentu ne’ebé adekuadu no implementa programa ezame ekivalensia nudár aproximasaun integradu iha eskola ba estudante sira iha nivel Sekundáriu iha Timor-Leste.

Husu ba Ministériu Justisa hodi aloka orsamentu espesífiku atu bele fó asisténsia no fasilita Ema ho Defisiénsia sira iha setór justisa. Aleinde ne’e, hasa’e abilidade husi Advogadu/a, Prokurador/a no Juis sira, nune’e bele halo interpretasaun ba lian jestual no mós ba psiko-sosial sira husi Ema ho Defisiénsia durante prosesu justisa nian.

Husu ba governu liu-liu Ministériu Obras Públiku atu kontinua tau orsamentu ne’ebé adekuadu no mós asegura katak kualkér planeamentu infrastrutura sira tenke dezeña tuir padraun universal ba Ema ho Defisiénsia sira nian hodi fó prioridade ba asesibilidade no kontinua garante katak Ema ho Defisiénsia sira bele asesu ho fasil no di’ak liu. Tanba durante ne’e, infrastrutura públiku sira hanesan edifísiu, estrada, ponte, Jardim no transporte públiku, inklui mós meius komunikasaun sira seluk seidauk asesivel ba Ema ho Defisiénsia tanba ninia dezeñu la tuir padraun universal Ema ho Defisiénsia nian.

Husu Ministériu Saúde no Ministériu Solidariedade Sosiál no Inkluzaun atu estabelese sentru atendementu integradu ba Ema ho Defisiénsia Psiko-sosiál ka saúde mental sira iha Timor-Leste.

Entretantu ekipa konjuta ba submisaun fó apresiasaun no agradese wain ba esforsu balun ne’ebé daudaun ne’e governu hala’o ona, hanesan iha proposta OJE 2023 hahú tau markadores ba asuntu Ema ho Defisiénsia, maske prosesu ba markadores hanoin presiza iha diskusaun kle’an tan, governu mós iha prosesu ba Ratifikasaun Konvensaun Internasionál ba Direitu Ema ho Defisiénsia ne’ebé estadu fó ona komitmentu, konsidera Ministériu ida-idak iha ona ambassador ba asuntu ema ho defisiénsia nian, iha mós esforsu pozitivu sira ne’ebé hatudu ona liu-liu Sekretáriu Estadu Juventude no Desportu, ne’ebé komesa integra no dezeña infrastrutura ne’ebé asesivel ba Ema ho Defisiénsia iha sira nia edifísiu, Ministériu Obras Públiku ne’ebé kontinua servisu hamutuk ho Organizasaun Ema ho Defisiénsia hodi dezeña infrastrutura ne’ebé iha asesibilidade iha sira nia edifísiu no mós fó oportunidade ba Ema ho Defisiénsia atu bele foti knaar nudár assessor tékniku ba asuntu inkluzaun iha sira nia Ministériu, Ministériu Transporte no Komunikasaun liu husi Diresaun Nasional Transporte Terestre ne’ebé kria rampa no fatin espesífiku ba Ema ho Defisiénsia sira hodi bele halo tratamentu ba dokumentu sira kona ba transporte nian.

Alende ne’e, iha mós oportunidade seluk husi Prezidente da Repúblika fó mós espasu ba reprezentante ema ho defisiénsia ida hodi sai ninia assessor tékniku ba asuntu inkluzaun ninian, esforsu hirak ne’e di’ak tebes no ami hakarak instituisaun estadu tenke kontinua mellora liu tan iha instituisaun servisu públiku sira seluk.


Print Friendly, PDF & Email

LEAVE A REPLY

Please enter your comment!
Please enter your name here