Home Notisia PPN Foun Atu Hahu nian Serbisu Ho Diak, Tenke Hatur Meja PN...

PPN Foun Atu Hahu nian Serbisu Ho Diak, Tenke Hatur Meja PN Tuir Lisan

293
0
Xefe Suku Bairo Pite, João Baptista da Costa Belo. [Foto: Raimundo Seguerau | 22.05.2020]

Reportazen Raimundo Seguerau

Relasiona ho aktu deputadu sira iha uma fukun Parlamentu Nasionál (PN), estraga patrimoniu parlamentu nian hanesan harahun meza Prezidente Parlamentu Nasionál (PPN) nian inklui kadeira, nune’e autoridade lokal husu parlamentu hatur meza no kadeira ho lisan.

Xefe Suku Bairo Pite, João Baptista da Costa Belo esplika, Prezidente Parlamentu Nasionál (PPN) foun Aniceto Guteres ho ekipa tomak halo serbisu di’ak, tenke hatur meza parlamentu ho kultura tanba uluk hatur ho kultura no agora mós hatur ho kultura.

Tuir Xefe Suku Joao hateten Timor-Leste iha kultura ka lisan, ho kultura mak bele luta hodi manan funu. Agora ita ukun-an ona, dezenvolve ita nia rain no hadia povu nia moris, hetan problema estraga sasan, orgaun estadu ida nian bolu lia-na’in sira hodi hatur fila fali.

“Bolu lia-na’in sira para atu hatur fila fali meza, kadeira ne’ebé mak baku fila, para Prezidente foun ne’e serbisu ho di’ak, serbisu ba povu atu dezenvolve ita nia nasaun”, dehan Xefe Suku Bairo Pite, João Baptista da Costa Belo ba Neon Metin iha nia kna’ar fatin, 22/05.

Nia haktuir iha fatin ne’ebé de’it problema sempre iha, maibé la’os hanesan deputadu sira hatudu ne’e ita moe, lolos labele baku fila meza, labele soe kadeira, ne’e labele akontese iha ne’ebá tanba uma fukun povu nian.

“Lolos sira tur hamutuk ko’alia de’it, depois la konkorda lori ba tribunal, ne’e karik bele, agora sira baku malu, depois sa’e hodi okupa lideransa parlamentu na’in tolu ninia fatin. Meza ne’ebé uluk hatur ho lulik ne’e sira baku fila tia ona ne’e sira sala”, nia lamenta.

Nia argumenta “ami sira katuas ona uluk kedas ami lakoi ida ne’e, iha suku ida ne’e mós akontese hanesan ne’e laiha, uma ida ami serbisu iha okos ne’e komunidade suku Bairo Pite ninia uma fukun mak ne’e, apalagi ita nia uma fukun parlamentu”.

Autoridade lokal ne’e mos hateten atu iha futuru labele akontese tan hahalok ne’ebe hanesan iha uma fukun Parlamentu Nasional, nune jerasaun foun mai labele halo tuir ida ne’e, buat ida la’o di’ak liu mak tuir Lbeei, ida ne’ebé mak loos no ida ne’e mak sala lori ba tribunal.

Iha parte sorin Xefe Suku Comoro, Eurico da Costa de Jesus hateten aktu ne’ebé deputadu sira halo iha uma fukun parlamentu nasionál, nudar aktu ne’ebé ladi’ak no konsidera la fó lisaun di’ak ba jerasaun sira, tanba uma fukun  ne’ebe sira tur la’os sira nian  maibé povu nian.

“Deputadu no deputada sira tur iha parlamentu ne’ebá, la’os naran ba tur de’it, maibé liuhusi festa demokrasia, husi eleisaun manan mak tuir iha ne’ebá. Nune’e, husu tenke respeita fatin sagradu povu nian ne’e”, hateten Eurico.

LEAVE A REPLY

Please enter your comment!
Please enter your name here