Home Notisia PR Renova EE Ba Daruak, Lu Olo: Espera Governu Aserta Ona Dadus...

PR Renova EE Ba Daruak, Lu Olo: Espera Governu Aserta Ona Dadus Apoiu Vulneravel Sira

261
0
Prezidente da Republika, Dr. Francisco Guterres Lu Olo. [Foto: Santina Lucia da Costa | 28.05.2020]

Reportazen Santina Lucia da Costa

Hafoin Parlamentu Nasional aprova hodi extende tan Estadu Emerjensia ba datoluk nian, ohin loron Prezidente da Republika dekreta ona renovasaun Estadu Emerjensia ne’ebe sei hahu hosi loron 28 Maiu oras 00h00 no sei remata molok meia-noite loron 26 Junhu 2020.

Liu hosi deskursu Prezidente da Republika, Dr. Francisco Guterres Lu Olo hateten tuir informasaun hosi Organizasaun Mundial Saude (OMS) ne’ebe fo sai iha loron 28 Maiu iha mundu tomak, ema liu tokon lima mak hetan moras Covid-19 no liu tokon rua mak rekupera no liu rihun atus tolu nolu mak mate.

Fonte hosi Indonezia rasik iha loron 27 Maiu 2020, iha ona transmisaun komunitaria, inklui labarik estudante barak. Iha Timor Osidental, katak Nusa Tengara Timur (NTT), iha 27 Maiu 2020, iha ona kazu konfirmadu 85, rekuperadu ema nain 9  no nain 1 mate. Iha Timor-Letse hetan konfirmadu nain 24 maibe rekupera hotu ona no sedauk iha tan kazu foun.

Prezidente da Republika rekonnese katak iha fulan 2 nia laran, negosiante barak, liu-liu negosiante kiik sira hapara ka hamenus sira nia atividade fila liman, maibe iha tempu susar ne’e, ita mos hare espiritu solidariedade sae makaas hosi emprezariu sira, organizasaun sosiedade sivil, konfisaun relijioza no ema ida-idak ho insiativa rasik, fó tulun ba malu.

“Ha’u hatene katak ajénsia nasional no internasional sira mós hato’o ajuda oioin ba komunidade. Ajuda sira ne’e akontese enkuantu Governu prepara mós pakote ekonómiku, hodi ajuda uma-kain kbiit-laek no apoia empreza privadu, atu traballadór sira labele lakon empregu ka saláriu hatún”, hateten Lu Olo iha Palacio Prezidensia, 28/05.

Lu Olo mos hatene katak apoiu husi governu la to’o lalais ba populasaun no ba empreza sira. Situasaun ida ne’e hamosu krítika oioin. Prezidente espera katak governu aserta ona dadus no bele ona hato’o apoiu, liuliu ba ita-nia ema vulnerável sira, iha tempu badak.

Liu hosi deklaraun Prezidente da Republika nian informa mos katak hosi relatóriu Centru Integradu Jestaun Krize (CIJK) ba Konferénsia Inter-Ministerial no lori ba Konsellu Ministrus, mak mosu proposta husi Governu haruka ba Prezidente da Repúblika, iha 25 Maiu 2020, atu hatutan Estadu Emerjénsia datolu.

Tuir Konstituisaun haruka, Prezidente da Repúblika konsulta nia órgaun rua, Konsellu Superior Defeza no Seguransa no Konsellu Estadu, iha loron 26 Maiu 2020. Hafoin rona opiniaun a-favor husi órgaun konsulta rua ne’e,  Prezidente Repúblika haruka kedas pedidu autorizasaun ba Parlamentu Nasional. Órgaun Estadu ida ne’e, hafoin diskute klean no tetu didiak, deside fó autorizasaun ba Prezidente Repúblika renova Estadu Emerjénsia.

Nune’e, hafoin hatuir prosedimentu legál hotu, ho kbiit ne’ebé Konstituisaun RDTL fó ba Prezidente da Repúblika, “ha’u dekreta horseik,  atu renova Estadu Emerjénsia, hahú ohin, 28 maiu 2020, 00h00 no sei ramata, minutu ida, molok meia-noite, iha loron 26 juñu 2020”.

LEAVE A REPLY

Please enter your comment!
Please enter your name here