Reportazen Francisco JDA
Ekipa Planu Elaborasaun Rekupera Ekonómiku ne’ebe hetan posse hosi Primeiru Ministru, Taur Matan Ruak ne’ebé kompostu hosi Dr.Rui Agostu Gomes, Dr. Rui Maria Arauju, Dr. Manuel Vong, Dr. Carlos da Silva Lopes “Saki” no Dra. Berta Montelvao iha palacio.
Liu hosi diskursu Primeiru Ministru hateten, governu hotu ne’ebé liu ona, halo esforsu boot ba kria kondisaun ba povu, atu hetan buat tolu importante mak vida naruk no saudavel, konesementu teknolojia no inovasaun ka adaptasaun ba revolusaun mundu ohin nian no padraun ida diak no dignu.
“Esforsu konsentra ida oinsá mak bele eleva rendimentu sidadaun sira no kombate disigualdade sosiais no regionais. Governu konsentra iha area lima importante, sosial ne’ebé fokus ba igualdadade no oportunidade no asesu ba servisu públiku sira, area ekonómiku ko’alia kona ba produtividade kresimentu no impregu. Infrastrutura ne’ebé fokus ba konetividade kompetetividade integrasaun nasionál regional, internasionál no melhora infrastrutura hanesan Estrada, portu no aero portu, komunikasaun, instituisional presta servisu ida efisiente ba ita nia sidadaun sira”, hateten Taur Matan Ruak iha palacio governu, 17/06.
Taut hatutan tenke kria ambiente negósiu ne’ebé di’ak, kria kondisaun ba no sidadaun sira bele fo sira nia kontribuisaun, partisipa iha dezenvolvimentu nia nasaun nian.
Taur Matan Ruak mos hateten oportunidade ida ne’e, para bele hetan minimu konsesus iha area sira importante, ba investimentu no difine prioridade klaru, ne’ebé hanoin nudar nesesariu, atu halo investimentu rekursu ne’ebé oituan iha, tenki investe barak, se hakarak normaliza fila fali ekonomia iha Timor-Leste.
“Ha’u nia orientasoes ba membru governu sira, fokus iha area tolu importante mantein reforma ne’ebé planeia iha 2019, bele abilita no posibilita governu, reduz birokrasia no seluk ne’ebé halo governu ne’e todan demais, fokus mós ba área produtividade no empregu investimentu, barak konsentra iha empregu, liu liu iha kapitál dezenvolvimentu produtividade. Espera oportunidade investimentu no reforsa mós kapasidade resilensia, aumenta area edukasaun, seguranca alimentar no área seluk. Presiza reforsa aumenta ita nia kapasidade, iha tempu krize, naturalmente halo avaliasaun diagnostika ida”, tenik Primeiru Ministru Taur Matan Ruak.
