Reportazen Zevonia Vieira
Desportu nudar area importante iha mundu, inklui Timor-Leste. Liu hosi desportu mos hanorin ema atu muda mentalidade ne’ebe responsavel no positivu, no deport mos sei promove rai ida iha mundu internasional bainhira hetan prestasaun diak.
Bainhira Sekretariu Estadu Juventude no Desportu (SEJD) atual, Abrao Saldanha hahu nia loron dahuluk iha edifisiu SEJD, relasiona ho jestaun desportu nian ne’ebe mak seidauk lao diak, ba Neon Metin Sekretariu Estadu Abrao hateten, dezenvolvimentu desportivu depende ba rekursus desportiva ne’ebe mak iha, ita presiza investe iha rekursus tekniku, atu nune’e prepara desportu iha nivel sosiadade, iha segment eskola, komunitaria mak neneik sae ba desportu prestasaun, maibe buat rua ne’e bele lao hamutuk, maske prepara ita nia desportu prestasaun iha nivel nasional no internasional, maibe ita lori desportu ne’e ba sosiadade ka komunidade.
Konaba jestaun desportivu, Abrao Saldanha hateten iha nivel jestaun desportivu sei hare hamutuk kondisaun saida mak iha ona no saida mak bele hadiak diak liutan, hodi bele atinji desportu prestasaun no sosiadade.
Saida mak hakarak atinji hosi politika foinsa’e milineal? Ba Neon Metin Abrao hateten ohin loron ho hashtag ida mak bolu foinsa’e milineal katak Foinsa’e Milineal Forsa Kreativa. Tanba sa mak joven milineal, tanba ohin loron tuir Politika Nasional Juventude tama kategoria joven mak idade 25 mai kraik.
Abrao hateten sira ida moris iha mileniu mai ho idade 25 anos, entaun sira ne’e mak foinsa’e lolos. Sira iha forsa no espiritu, oinsa ita lori ba iha kreatividade no inovasaun, para ita bele muda imajen ne’ebe ema dehan joven mak halo konflitu no tenke hare fali katak Joven ne’e Solusaun, joven ne’e forsa ba kreatividade, forsa ba inovasaun hodi lori Timor ne’e bao in.
Nia hateten ho idea ne’e mak sei kria programa sira hanesan maksimiza no orienta Centru Juventude sira, atu fo espasu sufsiente ba sira hodi espresa sira nia an, inklui reintegrasaun Arte Marsiais ba sosiadade, impodera juventude sira iha suku, liuliu suku foti inisiativa hodi dinamiza sira, apoiu inisiativa joven sira iha kreativade oi-oin, hatudu sira nia kreatividade no bele fo solusaun ba problema ne’ebe iha.
Politika ne’e bazea ba Prepektiva jeneru no inklusivu? Ba Neon Metin Sekretariu Estadu hateten programa sira hotu tenke harii baze rua ,hanesan inklusividade no sustentabilidade, ida ne’e mak nudar prinsipiu hosi programa sira, ne’ebe sei dezenvolve hamutuk ho ekipa. “Ukun laos 100 dias, ida ne’e ideas ne’ebe sei harii ho makina estadu ne’ebe mak iha atu halo iha mandatu”.
