Home EduTek Visaun SEJD Ba Tinan 2, Foinsa’e Milenial Forsa Kriativa, Desportu Iha...

Visaun SEJD Ba Tinan 2, Foinsa’e Milenial Forsa Kriativa, Desportu Iha Sosiedade no Prestasaun

2373
0
Sekretariu Estadu Juventude no Desportu, Abrao Saldanha. [Foto: Zevonia Vieira | 25.06.2020]

Reportazen Zevonia Vieira

Sekretariu Estadu Juventude no Desportu atual, Abrao Saldanha hahu serbisu ba loron dahuluk, hodi simu termo de entrega hosi Sekretariu Estadu Juventude no Desportu sesante, Nelio Isac iha salaun SEJD, 25/06.

Liu hosi deskursu dahuluk nian, Sekretariu Estadu Juventude Desportu, Abrao Saldanha hateten, hakarak agradese Secretariu Estadu Juventude no Desportu sesante, Nelio Isac, ba dedikasaun tomak iha area juventude no desportu, atu fo nafatin kontinuasaun serbisu ne’ebe mak iha tiha ona.

“Hanesan timoroan hau konta nafatin ita nia apoiu ba misaun. Hau hanoin katak ho diferensia partidu, labele sai moru ba ita atu la koalia ba malu, diferensia partidu ne’e mak fo oportunidade atu fo ideas diferentes, atu fo dinamika ba dezenvolvimentu ida ne’e. Saida mak hau halo, mak hatutan saida mak iha ona, hadia saida mak presiza hadia, harii serbisu saida mak ita hanoin nesesidade, atu ita halo ba serbisu iha area juventude no desportu, tuir opiniaun sira hosi tekniku sira no hau nia opiniaun rasik”, hateten Abrao

 Sekretariu Estadu, Abrao hateten visaun ba tinan rua nian ne’ebe mak Sekretariu Estadu atual atu aplika mak serbisu hamutuk, hodi ajuda joven sira atu hatudu sira nia kapasidade no forsa iha ita nia sosiedade.

“Ita nia serbisu sira sei ajuda “FOIN-SA’E MILENIAL FORSA KRIATIVA” atu hatudu joven sira nia talentu iha area oioin, ne’ebé fo prova ba sira nu’udar forsa ho kreatividade, hodi kontribui ba Timor-Leste nia dezenvolvimentu ho sira nia potensia tomak, hanesan hatur ona iha programa VIII governu nian ba juventude”, hateten Abrao

Abrao renkonnese katak ohin loron joven barak moris iha risku oin-oin nia laran. Joven barak mak sempre iha problema ho Lei, hetan violensia iha forma oioin, livre demais no lakon kontrola ba sira nia moris rasik, joven barak seluk mak moris iha dalan (street children. read), sira ne’ebé mak sexualmente ativu. Joven sira ne’ebé mak vulneravel tebes, atu hetan diskriminasaun, até marjinalizasaun husi sira nia sosiedade rasik.

“Ita sei halo buat hotu iha ita nia kompetensia, durante mandatu ida ne’e ajuda hadook ita nia joven sira husi risku oioin, ne’ebé sai ameasa ba sira nia moris. Ita nia programa no atividade sira mós sei ajuda joven hirak ne’ebé monu liu tiha ona, iha risku nia laran atu rekopera no reintegra ba ita nia sosiedade”, dehan Abrao

Abrao mos mensiona konaba area desportiva katak sei orienta serbisu ba desportu iha sosiadade no prestasaun, katak sei halo esforsu hotu, atu lori desportu ba to’o no hela hamutuk segmentu hothotu iha sosiedade nian, atu hatur baze ida forte hodi kontribui ba Timor-Leste nia prestasaun desportiva, iha nivel hothotu iha rai laran no rai liur. Iha tempu hanesan, ita sei kontinua programas no atividade desportu prestasaun sira, ne’ebé mak durante ne’e ita hala’o tiha ona.

Planu politika hosi Abrao Salsinha mos atu fasilita reintegrasaun organizasaun arte marsial sira iha sosiadade nia sira nia enkuadramentu iha sistema desportu nasional no sei hare atu fo tulun ba joven sira, hetan espasu ba explora sira nia potensia iha areas oioin, inklui oinsa mak reorienta centru juventude sira, atu presta serbisu ida ne’e ba ita nia juventude sira.

Programa seluk mak halo atividade ho Konsellu de Suku sira, membru husi juventude ne’ebé kompostu husi reprezentante joven feto ida ho joven mane ida. 

“Durante ha’u nia mandatu, ha’u hakarak atu ita halo serbisu hotu ne’ebé ita bele, atu empodera reprezentante joven sira iha konsellu de suku, atu bele dinamiza joven sira iha suku no ajuda sira explora sira nia potensia ho diak”, hateten Abrao.

LEAVE A REPLY

Please enter your comment!
Please enter your name here