Home Meio Ambiente Lixu Namkari Iha Eskola EBC 3° siklu ho EESJ 10 de Dezembru,...

Lixu Namkari Iha Eskola EBC 3° siklu ho EESJ 10 de Dezembru, Ida Ne’e Grave?

249
0
Lixu namkari iha eskola 10 de Dezembru. [Foto: Santina Lucia da Costa | 09.07.2020]

Reportazen Santina Lucia da Costa

Lixu soe nakmari iha area Eskola Ensino Baziku 3° Ciclu (EBC) ho Eskola Ensinu Sekundariu Jeral (EESJ) 10 de Dezembru Comoro, tanba komunidade sira ne’ebe mak hela besik eskola refere, soe tama lixu ba area eskola laran no haris fatin eskola  Eskola Ensino Baziku 3° Ciclu (EBC), mos la iha kondisaun neebe ijiene no abandonadu tanba laiha osan atu hadia.

Tuir Diretor Eskola Ensinu Sekundariu Jeral (EESJ), Domingos Xavio ba Neon Metin katak haris fatin ka toilet Ensino Sekundariu Jeral sufisiente no bee moos iha, maibe  ba Ensino Baziku 3° Ciclo ninian ne’e mak grave uituan, tanba sira laiha orsamentu, entaun sira seidauk hadia.

“Lixu ne’ebe mak iha kotuk ne’e, komunidade balun ne’ebe hela iha merkadu laran, ne’e mak soe fali mai iha eskola laran, ami lor-loron hamoos, maibe ami hamoos hotu, hanesan aban dadersan hanesan ne’e, ami mai fali eskola, lixu nakonu fali ona, eskola ne’e moos ne’e laiha”, hateten, Diretor EESJ, Domingos Xavio ba Neon Metin iha EESJ 10 de Dezembru Comoro, Dili, loron 09/07 semana kotuk liuba.

Domingos Xavio hatuta bainhira profesores ho estudante sira ba hamoos lixu, sira nia estudante barak, entaun balun uza luvas ho maskra no balun la uza, maske lixu ne’e fo impaktu ba saude, maibe ami ho estudante sira kontinua hamoos. Hamoos hotu ami haruka estudante sira ba fase liman.

Diretor nee informa komunidade sira hela iha kotuk, loke warung iha ne’eba, entaun bee foer warung nian ne’e, sira la lori ba sorin, maibe sira loke fali bee dalan ba area eskola nian, entaun bee foer ne’e tama fali mai iha area eskola, loron kuandu manas makaas bee iis maka’as, entaun fo impaktu ba sala de aula iha kotuk ne’e iis maka’as.

Domingos, dehan, Haree fila-fali ba komunidade ne’ebe mak hela iha laran, ida ne’e mak problema ba estudante sira, bainhira kuandu aula ne’e lao, sira ne’ebe mak hela iha laran, sira halo movimentu ba mai, entaun ne’e ladun di’ak ba estudante sira.

Domingos husu nafatin ba Ministeriu Edukasaun katak kondisaun eskola nee grave no mos ba komunidade ne’ebe hela iha area eskola ida ne’e, para hodi nune’e haree tetu, kondisaun sira ne’e bele hadia.

Iha tempu hanesan, Neon Metin konfirma ho Ministeriu Edukasaun Juventude no Desportu (MEJD), relasiona ho situasaun ne’ebe eskola refere hasoru, Armindo Maia hateten problema ida komunidade okupa, ita haree foer husi merkadu soe tama mai area eskola, problema ne’e kleur tebes ona, besik tinan 20 ona.

“Ita presija rezolve problema ida ne’e, maibe ne’e tenki envolve Autoridade Munisipiu Dili, komunidade sira ne’ebe hela resintu eskola laran, no komunidade sira ne’ebe hela iha liur, ita  sei rezolve buat ne’e neineik”, hateten Armindu Maia

Tuir observasaun Neon Metin, lixu ne’ebe mak komunidade sira iha merkadu laran soe mai iha area eskola laran barak tebes hanesan lixu plastiku, kaleng no ai-han sira ne’ebe dodok. Komunidade balun halo fahi luan iha laran, balun loke warung no ke’e bee dalan mai iha area eskola laran. Impaktu hosi lixu ne’e sai ameasa boot ba prosesu aprendizajen, tanba bele fo impaktu saude ba estudante no manorin sira.

Sala de Aula hamutuk 29, total estudante 2126, husi total estudante 2126 ne’ebe uluk iha sala ida 70. Situasaun moras pandemia Covid-19, tanba tenke tuir protokolu Covid-19, fahe ba rua, turma A ho B.

Print Friendly, PDF & Email

LEAVE A REPLY

Please enter your comment!
Please enter your name here