Home Notisia MAPCOMS Vizita Neon Metin, Husu Ita Hotu Hamutuk Dezenvolve Media

MAPCOMS Vizita Neon Metin, Husu Ita Hotu Hamutuk Dezenvolve Media

554
0
MAPCOMS hasai foto hamutuk ho ekipa Neon Metin. [Foto: Neon Metin | 13.07.2020]

Reportazen Adroaldo ‘Saretukau’

Iha fim de semana ne’e (11/07), Ministru Asuntu Parlamentar no komunikzsaun Sosial, Fransisco Jeronimo, halo vizita ba Média Online Neon Metin iha nia eskritótoru Haburas, Farol. Iha vizita ne’e Ministru husu atu kontinua servisu hamutuk RENETIL ho nia Media online Neon Metin ba dezenvolve media.

Iha Neon Metin nia fatin, Ministru Asunitu Parlamentar no Komunikasaun Sosiál, Sr. Franscisco Jerónimo agradese tebes ba Média Neon Metin ne’ebé simu ona nia no husu atu kontinua servisu hamutuk ba dezenvolve media iha Timor-Leste.

“Ha’u sente orgullu no agradese teb-tebes ba ita boot sira, tanba ita boot sira bele simu ha’u iha fatin ida ne’e. Ha’u mai ho misaun ida katak, ha’u sei kaer knaar ida ne’e, se la hakbesik ba média sira, ha’u la hatene saída mak ha’u atu halo. Portantu ha’u tenki mai hasoru média sira hodi rona na’in hirak nia preokupasaun, na’in hirak nia hanoin”, Ministru Fransisco hatete.

Ministru mos husu obrigadu teb-tebes ba Neon Metin, Kompañeiru Saky, mak fó ona esplikasaun klaru hahú hosi 1989 to’o ohin loron, nafatin iha mahon Renetil ni-nian.

“Hau hanoin ne’e importante atu nune’e istória, aktividade ne’ebé mak la’o sempre baku ba nafatin misaun ne’ebé mak Renetil nia hakarak hodi bele kontribui ba iha estadu no nasaun ida ne’e,” Ministru aumenta.

Haktuir mos katak ni-nia prezensa atu kopera ho média hotu-hotu no la halo deskriminasaun, maibé oinsa mak bele iha servisu hamutuk ida ne’ebé di’ak.

“Prezensa ha’u nian mai iha ne’e atu fó de’it mensajen ba públiku ba ema hotu-hotu katak governu, lakoi atu halo deskriminasaun ba média sira. Maibé governu hakarak atu mai partisipa no koopera ho média hotu-hotu, atu média online ka média imprensa, média saída de’it mak iha ne’e, governu iha obrigasaun atu to’o, atu hatene, atu nune’e bele haree hamutuk, halo nusa mak ita bele iha koperasaun ba malu atu halo servisu ne’ebé mak di’ak liu tan. Atu nune’e ita bele fo kontribuisaun ba ita nia rain ida ne’e liu hosi ita nia knaar ida-idak, hanesan mos knaar iha média ni-nian no mos área seluk ne’ebé hala’o”, Ministru Fransisco reforsa liutan iha nia intervensaun amigavel ho Neon Metin.

Iha tempu hanesan Ministru mos hato’o mensajen ba públiku katak governu iha ni-nia komitmentu atu la’o hamtuk ho média sira, atu hadi’a média sira. Nia husu atu tau hamutuk ita nia hanoin, hodi dezenvolve média Timor-Leste ne’e sai média ida ne’ebé mak fo saí informasaun ida ne’ebé ho kualidade no kredível.

“Ha’u fiar teb-tebes katak Média Neon Metin ne’ebé mak iha mahon Renetil ne’e, sei dezenvolve an di’ak liu ho kualidade tanba, ita boot sira nia prinsípiu ne’e, mak ha’u haree katak labele hamonu, tenki kaer tanba hotu hotu kaer hela prinsípiu ida ne’e la’o nafatin”, Ministro fo liafuan konfiansa ba servisu Neon Metin nian.

Ministru Fransisco hatete katak nia prezensa iha atu fo de’it mensajen katak, ba oin ita tenki hamutuk nafatin, atu halo koperasaun di’ak liu tan hodi dezenvolve média iha Timor ne’e bele sai média ida ne’ebé fo informasaun la’os kuantidade de’it, maibé informasaun ne’ebé kualidade no kredível.

Sekretariu Jeral RENETIL, Joaquim Russuo Fonseca, expresa ninia haksolok ho vizita Ministru nian no hato’o kona ba importansia hosi existensia hosi Neon Metin nian iha sosiedade nia let.

“Renetil liu hosi Neon Metin ne’e hakarak kontinua kontribui ba dezenvolvimentu, liu hosi publikasaun de informasaun ba lee na’in sira. Tanba ita iha soseidade ida diversu, ita iha sosiedade ida heterojéniu, Opiniaun sira nian ita apresia maibé, ami mos hanoin katak iha sosiedade demokrátiku ida, lee na’in presiza hatene saída mak faktus, saída mak lae. Durante ne’e ho limitasaun oi-oin Neon Metin koko atu halo buat ida”, Russuo, Sekretariu Jeral RENETIL hato’o iha nia introdusaun Neon Metin ba Ministru Fransisco Jeronimo.

Iha vizita Ministru Fransisco nian ne’e hetan prezensa hosi Sekretariu Jeral RENETIL ho nia vice sira, no mos Fundador RENETIL nian ida, hamutuk ekipa media online Neon Metin sira hotu.

Print Friendly, PDF & Email

LEAVE A REPLY

Please enter your comment!
Please enter your name here