Reportajen David da Costa
Prezidente Republika (PR) José Manuel Ramos-Horta sei ko’alia ho Prezidente Parlamentu Nasional (PPN) Aniceto Longinhos Guterres, para fó pose ba membru Parlamentu Nasional foun ho Governu foun ne’e, halo lalais iha fulan Juñu nia laran.
Prezidente Horta hateten, Tribunal Rekursu ohin halo ona nia pronunsiamentu kona-ba rezultadu eleisaun parlamentu ne’ebé maka maioria iha parlamentu, tanba ne’e sei ko’alia ho Prezidente Parlamentu Nasional, para marka data ba tomada de pose, ba membru Parlmentu foun no governu foun.
“Ha’u sei ko’alia ho Prezidente Parlamentu Nasional, para hamutuk ita marka ona data ajendamentu ba pose parlamentu Nasional foun, para governu foun tomada de pose, atu governu foun bele aprezenta programa ba parlamentu, tanba ita nia ajenda Nasional i International klean tebe-tebes no naruk tebe-tebes. Ha’u pesosalmente hakarak kolaborasaun diak ho Parlamentu foun ho governu,”dehan Ramos-Horta, iha Aeroportu Nicolao Lobato Comoro, segunda 5/06.
Nia hatutan ba oin Xefe Estadu hakarak ajuda para kria klima ne’ebé maka diak iha Parlamentu Nasional laran, entre bankada sira hotu-hotu. Para hotu-hotu hamutuk hodi tane apoiu ajenda Nasional sira hotu.
Tanba ajenda Nasional iha planu doméstika, tenke aselera rekuperasaun ekonomia, iha ajenda domestika tenke haree buat ne’ebé governu sesante husik ba governu foun para kontinua. Hanesan governu sesante mós simu projeitu balun mai husi governu anterior hodi halo to’o remata hanesan portu Tibar, kabu submarinho maske seidauk remata maske porsesu ne’e hahú kleur tiha ona, Aeroportu foun ne’e ko’alia desde 20 anos ona maibé foin asina kontratu kompañia boot Indonesia.
Nia salienta projetu sira ne’ebé maka governu sesante atu fó ba governu foun tenke haree no halo kontinua labele demora no intrope. Buat seluk hanesan lei ruma ne’e bele muda, maibé projeitu ne’ebé maka halo dadun no hahú tiha ona tenke haree no kontinua aselera.
“Fó pose ne’e ha’u nia preferénsia ne’e urjente, hau sei ko’alia Prezidente Parlamentu para aselera prosesu ne’e, iha fulan Juñu,”nia konklui.
