Reportazen Adroaldo ‘Saretukau’
Iha aniversáriu Centro Nacional Chega ba datoluk nian, liu hosi deskursu Diretor Ezekutivu Hugo Fernandes informa katak Centro Nasional Chega! Mos halao ona programa fahe esperiensia Timor nia rekonsiliasaun ba nasaun sira seluk.
Hugo hateten iha tinan kotuk Embaixada Australia fo oportunidade ba CNC, atu halo jornada ida iha sidade hotu iha Australia, hodi partilha fahe esperiénsia Timor nian konabá rekonsiliasaun.
Nia hatutan partillha esperiénsia Timor nian ho kolega sira iha Indonézia, Ekipa Instaladora Komisaun Nasional Verdade Rekonsiliasaun Indonésia nian.
“Orgullu Timor nia valor ba ema rai seluk, atu aprende no atu sai nu’udar identidade nasional Timor nian. Ida ne’e hotu hatudu katak, Timor iha valores ne’ebé boot no ema rai seluk atu mai aprende, ha’u hanoin ida ne’e tenke sai nu’udar identidade Nasional Timor nian”, hateten Hugo iha loron aniversariu CNC ba datoluk iha Antigu Komarka Balide, 17/07.
Iha fatin hanesan Prezidente interinu CNC, Arlindo Francisco Marçal haktuir atu habelar esperiénsia Timor-Leste nian konabá mekanizasaun tranzitóriu nian, CNC mos halo parseria ho organizasaun sira iha rai li’ur durante tinan tolu. CNC fahe ona esperiénsia Chega nian iha Aceh, Bali, Filipina, Sri lanka, Banglades, Cambodia, Portugal, Alemaña, Estadus Unidus da Amérika, Áfrika do Sul, Sereleona no Canadá.
Nia hatete Centro Chega mos nudar fatin ida, hodi rai seluk mai aprende. Iha 2019 Centro Chega fasilita interkámbiu ho delegasun hosi Komisaun Lia Los no rekonsiliasaun Aceh, Indonézia no vizitasaun Bangsa Moru Winda Nao Filipina, simu mos delagasaun G7+, simu edukador sira hosi Guatemala, Kosovo, Myanmar no membru sira tranzisional Justice Asian Network.
