Home EduTek Eskola Ensino Basiku Farol Kumpri Regras COVID-19, Maibe Exame Tinan Ne’e Sei...

Eskola Ensino Basiku Farol Kumpri Regras COVID-19, Maibe Exame Tinan Ne’e Sei Diferente

553
0
Diretora Eskola Ensino Basika Farol, Irene Silva Soares Morato. [Foto: Marcio Morato | 10.08.2020]

Reportazen Marcio Morato no Helena Pereira

“Ami nia dirijente hatoo mai ami katak ita nia exame ba alunos sira sei la hanesan ho exame anterior antes de COVID-19 mosu, ho nune’e materia ne’ebe ita la hanorin, ita labele fo sai fali iha exame, selae maka alunos sira sei hetan problema boot iha sira nia exame”  José da Costa

Relasiona ho moras surtu COVID-19, impede hotu movimentu ka atividade importante sira liu-liu prosesu aprendizajem, ne’ebe mak tenke hamosu regras oin-oin, hodi preven ema hosi virus Corona.

Neon Metin halo observasaun direita iha Ensino Basika Farol, eskola refere reativa ona, tanba tuir ona kriteriu hosi Ministeriu Saude no Organizasaun Mundial Saude (OMS) nian.

Ba Neon Metin Diretora Eskola Ensino Basika Farol, Irene Silva Soares Morato hateten katak inisiativa reativa ensino aprendeizajem ba estudante sira tamba hetan ona concordata husi parte Ministerio Saúde.

“Konaba reativa eskola ba estudantes sira, tamba hetan inspeção husi Ministreio Saúde. Antes atu reativa ami mos prepara fatin atu estudante sira mai eskola. Bainhira Ministerio Saúde mai halao visita ba dala uluk iha ami nia Eskola, sira dehan ami nia eskola seidauk bele kompleta rekejitus, atu halao prosesu aprendizajem, tanba fatin ba estudante sira seidauk preparado. Husi ne’e ami hahu limpeza no halo preparasaun ba kada sala de aula. Depois de preparasaun ami nia eskola hetan hikas segunda visita husi parte ministerial nian, husi ne’e maka foin hetan akordo, hodi assina  no bele kontinua halao prosesu aprendizagem ba estudantes sira” hateten Irene Morato iha ninia edifício Eskola Farol, Dili, Segunda feira, 10/08.

Diretora ne’e mos argumenta katak ensino ba aprendizajem alunus sira nian lao ho diak, maske iha situasaun ne’ebe difisil hasoru pandemia COVID-19. Ho nune’e nia koko nafatin, hodi buka maneira oioin atu alunos sira labele lakon oportunidade iha sira nia prosesu aprendizajem nian.

“Ami fahe maskara ba alunos sira, mantein nafatin limpeza, kada klase bee balde  tenke iha, sabaun tenke iha no mantein nafatin distansiamentu entre alunos sira. Iha eskola ida ne’e ami nia alunos barak então distansiamento ne’ebe ami halo ba sira bazeia ba klase ne’ebe eskola iha, hodi fahe sira ba grupo rua. Grupo ida mai iha semana ida tomak no semana oin sira hela fali iha uma, hafoin fó fali oportunidade ba grupo seluk, atu tuir aulas ne’ebe professores sira prepara”, dehan Diretora iha ninia fatin.

Diretora nee informa katak material ba prevensaun COVID-19, hetan ajuda husi parte governu Japaun liu hosi KOICA. Material ne’ebe hetan mak hanesan maskra hamutuk 2000 resin no sabaun fase liman, ho nune parte eskola prepara balde, ne’ebe hasai hosi kofre eskola nian.

Iha fatin hanesan manorin língua Inglesa, Jose da Costa hateten prosesu aprendizajem ba estudantes sira no ba professores sira lao normal, tamba kumpri rekejitus ne’ebe maka linha ministerial fó sai. Além de ne’e, sira mos prátika duni kriteria ne’ebe maka Ministerio Saúde propõin atu prevene-an hosi  COVID-19.

Manorin nee konfesa katak eskola ne’e hasoru difikuldade ba prosesu aprendizajem, tanba nia situasaun la hanesan antes virus Corona iha, ho nune exame ba tinan ida ne’e, sei diferente hanesan tempu uluk, tanba materia sira ne’ebe hanorin ba alunus sira sedauk kompletu

“Ami nia dirijente hatoo mai ami katak ita nia exame ba alunos sira sei la hanesan ho exame anterior antes de COVID-19 mosu, ho nune’e materia ne’ebe ita la hanorin, ita labele fo sai fali iha exame, selae maka alunos sira sei hetan problema boot iha sira nia exame” dehan José.

estudante sira iha prosesu aprendizajem iha eskola Farol. [Foto: Adroaldo | 10.08.2020]

Entretanto estudante Rivaldo de Jesus Lodoe sente konfortavel ho prosesu aprendizajem maske hasoru hela moras surtu COVID-19.

“Eskola Farol ne’e professor sira halo sistema fahe ba grupo A no B. Hau sente ida ne’e kapas tebes tamba ho maneira ida ne’e bele prevene COVID-19, hodi nune’e’e labele daet ba kolega sira seluk, bainhira tama iha ensino aprendizajem nia laran” dehan Rivaldo

Estudante 9o ano ne’e haforsa liu tan katak iha eskola Farol estudante hotu sei kumpri regras ne’ebe maka Ministerio de Saúde vigor, liuliu iha prátika ba prevensaun COVID-19 nian.

“Iha Eskola Farol ne’e bele dehan katak maioria estudante sira kumpri duni regras ba prevensaun COVID-19, se bainhira alunos balu mai haluha uza mascara, professor sira sei fo sansaun hodi duni ba uma ka segurança skola nian sei la fo tama” dehan Rivaldo.

Eskola Farol nudar eskla central hosi filial haat, Vila-Verde, Rumbia, Tuana-Laran no Fatuhada. Kada klase komposta husi 60 alunos, maibe depois de COVID-19 kada klasse redus tiha ba nain 25 ou 31 alunus. Total manorin hamutuk nain 69, kontratadu hamutuk 18, voluntariu nain 1 no sira seluk permanente. Total estudante iha eskola Farol 3 Ciclo hamutuk 1577 no hosi 1 no 2 ciclo hamutuk nain 1008.

*(Marcio Morato no Helena Pereira nudar estajiadu iha media RENETIL Neon Metin)

LEAVE A REPLY

Please enter your comment!
Please enter your name here