Home Notisia Petisaun Kontra Kriminaliza Defamasaun, Fidelis: Sedauk Simu Esbosu no Laiha Materia Atu...

Petisaun Kontra Kriminaliza Defamasaun, Fidelis: Sedauk Simu Esbosu no Laiha Materia Atu Komenta

313
0
MKKDI hasoru malu ho Ministru Prezidensia Konsellu Ministrus, Fidelis Manuel Leite Magalhães. [Foto: Gaspar "Tali Besi" | 25.08.2020]

Movimentu Kontra Kriminaliza Defamasaun no Injuria (MKKDI) hasoru malu ho Ministru Prezidensia Konsellu Ministrus, Fidelis Manuel Leite Magalhães hodi hatoo hanoin ba pozisaun kontra no rejeita total esbosu lei kriminalizasaun defemasaun ne’ebe inisia hosi Ministeriu Justisa.

Iha enkontru ne’e portavoz MKKDI, Inocencio Xavier hateten Ministeriu Justisa hamosu esbosu lei ne’e iha propagasaun COVID-19 no  la fo tempu naruk ba sosiadade sivil sira hodi hatama sira nia parsere no la halo diskusaun naruk ho Ministeriu Justisa.

Inocencio dehan husu ba governu katak Le ne’e sei hamate espiritu sosiadade sivil atu halo kritika, hamate hodi kombate korupsaun, sei afeta mos ba vitima kazu violensia sexual iha tribunal no iha relatoriu CHEGA! mos rekomenda ona katak labele kriminaliza defamasaun maibe materia defamasaun ne’e prosesa nafatin hanesan dafamasaun sivil.

Iha tempu hanesan portavoz MKKDI Marcelina Amaral mos fo hanoin katak esbosu lei kriminaliza defamasaun ne’e sei fo todan ema vulneravel sira, liu-liu vitima violasaun sexual ka violensia bazea ba jeneru laiha kbiit hodi koalia iha tribunal ba kazu sira ne’ebe sira hasoru hosi ema sira ne’ebe karik iha poder.

Iha diskusan refere pare JSMP nian mos hatoo hanoin katak esbosu lei kriminaliza defamasaun ne’e la nesesariu ba iha nasaun demokratiku hanesan Timor-Leste no JSMP sujere diak liu fo prioridade oinsa mak Ministeriu Justisa hare asuntu lei organiku judisiariu.

Hosi parte Asosiasaun Jornalista Timor Lorosa’e (AJTL) mos fo hanoin katak rejeita total esbosu nee tanba sei hamate liberdade imprensa no jornalista sira sei sensura an hodi la fo sai informasaun kritiku no los sira ne’ebe hetan hosi prosesu investigasaun.

Hatan ba MKKDI nia hanoin kritiku sira ne’e Ministru Prezidensia Konsellu Ministrus hatan katak  to’o ohin loron sedauk simu materia konaba esbosu lei kriminalizasaun defamasaun hosi Ministeriu Justisa.

“Materia to’o agora sedauk iha no sedauk simu, materia ba esbosu ne’e to’o agora sedauk iha prosesu ida. Simplismente labele komenta tanba laiha materia ida”, hateten Ministru Fidelis iha salaun enkontu palacio governu, 25/08.

Ministru hatutan tenta atu la diskuti ba materia ne’ebe sedauk iha, “ami simu petisaun maibe amil abele aponta buat barak tanba sedauk simu esbosu”.

Maske nune’e Ministru konfesa katak simu ona submisaun barak konaba esbosu lei kriminalizasaun defamasaun hosi sosiadade sivil no jornalista sira.

Liu hosi petisaun ne’e rasik MKKDI hatoo nia observasaun katak esbosu ne’e sei hamosu impaktu no konsekuensia sir aba estadu katak estadu sei proteze reputasaun hosi pessoa individual sira, reputasaun ema nian, hanesan valor juridiku ne’ebe ladevia rezulta investimentu estadu nian tanba relasiona ho ema nia personalidade raik (natureza privadu). Estadu sei proteje mos reputasaun hosi pessoa hosi koletiva ekiparadu (polisia, ofisial governu no individu sira ne’ebe iha relasaun ho politiku no kriminozu sira).

Esbosu ne’e mos sei implika gastu estadu nian bai ha instituisaun Sistema autoridade judisial, aumenta pezu serbisu barak liutan bai ha autor judisial sira no bele iha konsekuensia ba administrasaun justisa ba kazu ne’ebe relevante liu iha sosiedade hanesan kazu korupsaun no krime publiku sira seluk.

Bele limita papel KAK no PDHJ ba kombate korupsaun no promove boa governasaun no hatun imazem estadu Timor-Lese iha mundu internasional konaba indese demokrasia nian.

Alende ne’e tuir MKKDI mos katak sei fo impaktu ba sosiade hanesan hamate Liberdade imprensa no espresaun no mos papel kontrolu sosoal, impede implementasaun Lei Protesaun Testemunha no galo tauk testemunha sira atu fo sira nia depoimentu (sasin) iha kualker kazu, sei hametin realidade silensia no la enkoraza vitima violensia bazea ba jeneru nian, tanba vitima sei tauk atu koalia sai faktu sira ho loloos iha Sistema justisa formal no numeru labarik ne’ebe konflitu ho lei sei aumenta haree katak resonsabilidade criminal hahu ho idade 16.

Liu hosi petisaun refere MKDDI mos rekomenda ba Primeiru Ministru liuhosi Konsellu Ministru atu kansela proposta alterasaun kodigu penal konaba kriminaliza defamasaun no injuria, governu atu asegura sosializasaun no implementasaun lei kodigu sivil ho nia prosesual sira no promove investimentu natoon ba Sistema judisial no husu ba Prezidente Republika la bele promulga proposta dekretu lei ne’e.

Petisaun ne’ebe Movimentu Kontra Kriminaliza Defamasaun no Injuria prepara hetan asinatura hosi teritoriu tomak hamutuk 819 neebe mai hosi sosiadade sivil, akademista, komunidade no jornalista sira.

Movimentu ne’e rasik kompostu hosi PDHJ, CI, AJTL JSMP, ALFELA, AJAR, HAK, Akademista sira, OXFAM, FONGTIL, NDI, La’o Hamutuk no komunidade sira.

Print Friendly, PDF & Email

LEAVE A REPLY

Please enter your comment!
Please enter your name here