Reportazen Adalgisa Pereira
Organizasaun rezistensia Sagrada Familia (OSF) realiza seminariu refletivu ho nia tema “Mobiliza Populasaun iha loron Konsulta Popular 1999 husi Prespetiva Organizasaun Sagrada Familia(OFS)”.
Liu hosi seminariu ne’e membru orgaun diretivu OSF, Ricardo Ribeiro hateten seminariu nee premeira ves Organizasaun Sagrada Familia halo nudar reflesaun ida ba komemorasaun loron Konsulta Popular 30 de Agostu.
“Orgullu no kontente tamba nee buat diak ida atu bele fahe esperensia no fahe informasaun kona-ba kontribuisaun OSF ba komemorasaun 30 de Agostu”, dehan Ricardo Ribeiro ba Neon Metin iha Fatuhada, 29/08.
Nia hatutan liu tan seminariu ida nee mos fahe esperensia ba jerasaun foun sira kona-ba kontribuisaun ne’ebe mak organizasaun ne’e halo ba loron Konsulta Popular, liu husi mobiliza massa, organizasaun, membru sira no mos timoroan hotu-hotu fo votos, tanba lakohi simu otonomista liu husi papel lideransa sira.
Iha fatin hanesan Abrão Pereira nu’udar jerasaun foun hateten seminariu nee forma refretivu ida, atuk onvida responsavel balun husi OSF atu partilla informasaun kontribuisaun ne’ebe organizasaun ne’e halo.
“Ita hatene katak loron Konsulta Popular nudar loron istoriku, tamba nee mak juventude OSF halao aktividade ida ne’e, atu partilla informasaun kona-ba oinsa mak iha momentu ne’eba organisasaun rezistensia sira nee kontribui ba iha sosializa, partikularmente iha prosesu Konsulta Popular”, dehan Abrão Pereira ba Neon Metin
Sai orador ba seminariu refere mak Sekretariu Jeral OSF, Professor Anterio Benditu da Silva , Ricardo Ribeiro no hetan partisipasaun husi juventude no kaixa klandestina husi organisaun OSF.
