Home EduTek Eskola Sekundaria Olocassa Ossu Tinan 18 Laiha Haris Fatin, Estevão: Obriga Labarik...

Eskola Sekundaria Olocassa Ossu Tinan 18 Laiha Haris Fatin, Estevão: Obriga Labarik Sira Ba Mota Kuak

909
0
Adjuntu Director Eskola Sekundaria Geral Olocassa Ossú Estevão De Carvalho. [Foto: Adalgisa Pereira | 25.10.2020]

Reportazen Adalgisa Pereira

“Sente triste banhira iha eskola laiha haris fatin, tan ne’e sira ba duut laran no mos ba mota laran, maske hanesan estudante laiha etika maibe tan deit laiha haris fatin ami tenke halo ida nee”. Aida a.da Costa

Edukasaun kontinua sai preokupasaun ba estudante no manorin sira, liu-liu iha area rural. Jornalista Neon Metin halo observasaun direita ba Eskola Sekundaria Jeral Olocassa Ossu, Municipiu Viqueque ne’ebe hasoru difikuldade barak hanesan infrastrutura, fasilidade eskola, haris fatin no moru eskola ne’ebe laiha, hodi halo animal sira tama ba bairo eskola refere

Adjuntu Director Eskola Sekundaria Geral Olocassa Ossú Estevão De Carvalho ba Neon Metin hateten eskola ne’e tinan 18 ona, maibe sei hasoru dezafius barak tanba aula, kadeira no meza la sufsiente, atu akumula estudante sira ne’ebe ho volume as, haris fatin laiha no laiha moru.

“Dezafius ne’ebe ami hasoru mak haris fatin laiha, bainhira labarik sira atu soe bee, obriga sira tenke ba mota kuak no professor sira ba komunidade sira nia haris fatin, ida ne’e mak obstaklu no dezafius boot”, hateten Adjunto Diretor Estevao, iha Ossu, 24/10.

Nia informa katak sala de aula hamutuk 12 deit la sufsiente, tanba sala de aula ida iha estudante hamutuk 50, tanba ema barik liu no balun hamrik deit.

Adjuntu Director ne’e hatutan katak odamatan ba sala de aulas nian laiha, tan ne’e animal sira toba iha laran no livru ne’ebe mak rai iha edifisiu deit no sala profesores mos hamutuk hotu.

Nia dehan maske hasoru dezafiu hirak ne’e maibe professor sira nafatin esforsa an, hodi hanorin estudante sira tuir kbiit sira ne’ebe mak iha.

Iha fatin hanesan estudante Aida a.da Costa no Graciano de A.do Santos konfesa katak biblioteka iha eskola nee laiha, maske eskola ne’e ho kondisaun ne’ebe mak ladiak maibe nafatin hetan motivasaun no lisaun husi professores sira, hanesan eskola sira seluk maibe sira sente triste banhira iha eskola laiha haris fatin, tan ne’e sira ba duut laran no mos ba mota laran, maske hanesan estudante laiha etika maibe tan deit laiha haris fatin ami tenke halo ida nee.

Eskola refere hetan apoiu laptop, prozetor no osan oituan husi estudante Australia maibe sasan sira ne’e la uza, tamba lina eletrisidade iha sala laran la funsiona.

LEAVE A REPLY

Please enter your comment!
Please enter your name here