Reportazen Santina Lucia da Costa
“Depois funu ne’e hotu, liuliu ita nia gerileiru sira ne’ebe tun husi ai-laran, sira ne’ebe tinan 24 iha ai-laran, barak mak uma laiha, rai laiha, lor-loron ba koa-tua, haree karau, halo toos. nNe’e hanesan prioridade ida Ministru MAKLN”. Riak Leman
Konsellu Kombatente Libertasaun Nasional (KKLN) halo sorumutu ho Prezidente Republika, Dr. Francisco Guterres Lu Olo, hodi konvida Prezidente Republika partisipa no halo aberutra ba Asembleia Jeral KKLN ne’ebe mak sei halo iha loron 18-20 Novembru 2020.
Ba jornalista sira Prezidente KKLN, Vidal de Jesus “Riak Leman” hateten KKLN konvida Prezidente Republika, hodi loke asemblea jeral ne’ebe mak sei halo. Nia dehan KKLN mos konvida Primeiru Ministru, Taur Matan Ruak maibe sei la partisipa tanba Primeiru Ministru halo enkontru iha Konsellu Ministru no sei ensera deit serimonia refere.
Riak Leman hateten hala’o asembleia jeral, atu aprova sira nia planu estratejiku ne’ebe mak ekipa tekniku prepara , aprova mos bandeira KKLN nian, logo KKLN no aprova mos rezimentu asembleia nian, maibe atu implementa ne’e depende ba orsamentu ne’ebe mak iha.
Nia akresenta planu kona-ba veteranu sira, aprova planu sira para atu implementa hodi rezolve problema veteranu sira nian, “ita hotu hatene katak, depois funu ne’e hotu, liuliu ita nia gerileiru sira ne’ebe tun husi ai-laran, sira ne’ebe tinan 24 iha ai-laran, barak mak uma laiha, rai laiha, lor-loron ba koa-tua, haree karau, halo toos, tanba ne’e hanesan prioridade ida Ministru Asuntu Kombatentes Libertasaun Nasional (MAKLN) atu tau orsamentu hodi bele halo sira nia uma, haree mos oan kiak, faluk sira ne’ebe halerik hela.
Relasiona ho programa ne’ebe mak luta iha ai-laran durante tinan 24, sei hein Orsamentu Jeral Estadu 2021 nian, bainhira aprova ona mak bele halo prosesu.
Nia afirma prioridade seluk halo uma ba veteranu tinan 24 hamutuk 60, entre sira ne’e barak mak kontinua ho kondisaun moris iha terus no susar , tanba ne’e mak MAKLN hanoin atu halo uma ba sira.
Prezidente KKLN, hatutan, Planu halo uma veteranu nian ba 2021 sei aumenta tan 40 no restu hela na’in 11 no barak mak mate ona, maibe ida ne’e sei haree.
Nune’e, Riak Leman mos hateten, Kona-ba re-verifikasaun ba veteranu, antes ne’e halo ona maibe governu lao ho orsamentu duodesimu temporaria entaun labele kontinua. Hein orsamentu jeral estadu 2021 mak aprova, entaun sei kontinua halo verifikasaun ba veteranu ne’ebe seidauk rejistu no halo re-verifikasaun ba naran ne’ebe mak rejistu ona.
Entretantu, Riak mos dehan, kona-ba edifisiu ba KKLN serteza ona mak iha arte moris nia fatin, Ministeriu Justisa fo ona despaixu, agora hein de’it orsamentu bainhira aprova ona, hadia edifisiu refere.
