Reportazen Henrique S. De Jesus
Governu liu husi Sekretariu Estadu Juventude no Desportu (SEJD) loke kompetisaun dansa ginástika ba estudante sira husi ekola hamutuk 25, husi nivel ensinu Báziku iha Dili laran 12, nivel Ensinu Sekundária 10 iha Dili laran no 3 mai husi Manatuto.
Vice Ministru Edukasaun Juventude no Desportu, Dr. Antonio Guterres hateten governu iha inisiativa kria atividade ida ne’e, hodi dezenvolve talentu joven sira nian no hanorin sira moris iha vida saudável, tamba foinsa’e ne’ebe saude no edukasaun diak, mak nasaun mos sei sai forte.
“Atividade ginástika ne’e hahu ona iha 2010, ba tinan ida ne’e SEJD hola inisiativa hodi rekupera fila fali ita nia atividade ida ne’e, para atu bele dezenvolve talentu joven sira nian, liuliu iha nivel eskolaridade husi Ensinu Baziku ba to iha Ensinu sekundariu geral, tamba sira mak idade ida ne’ebe produtivu, ita presija iha duni ita nia program sira ne’ebe iha animasaun divertimentu oinsa mak atu bele hasae liu tan talentu ita nia joven sira nian. Foin sa’e sira tenki iha saude diak ho edukasaun diak nasaun mos forte” dehan Antonio, SEJD 17/11/2020.
Nia deha programa ne’e sei haluan, hodi kobre ba teritoriu Timor laran tomak, tamba nia iha vantagen bo’ot, liu-liu iha atividade extra kurikular nian, tamba ne’e mak SEJD sei haluan tan ba iha nivel munisipal sira para aban bainrua mai iha nivel nasional karik sir bele iha ona selesionadu.
Nia informa Professor ba edukasaun fizika ne’e menus, tamba ita uza barak liu mak iha professor sira iha tempu Indonezia nian, governu agora dadauk liu husi UNTL, Departamentu Edukasaun Fizika no Desportu hahu ona halo kooperasaun ho SEJD, hodi prepara rekursu no planu hodi koopera ho entidades nasional no internasional hotu hodi dezenvolve desportu iha Timor.
Nune’e mos estudante hosi Eskola Santu Antonio Manatutu, Nivia Bakhita Correa orgullu partisipa iha kompetisaun ne’e, maske dalabarak kompetisaun sira hanesan ne’e iha Dili laran deit, maibe iha oportunidade ida ne’e iha esperansa sei sai hanesan manan nain.
“Agradese tebes ba oportunidade ida ne’e, tamba kompetisaun ne’e babain entre eskola sira iha Dili laran deit, ami orgullu tebes tamba hetan oportunidade ida ne’e. Primeira vez ami tuir kompestisaun Ginástika iha nivel nasional ida ne’e, Hau hanoin ba futuru karik diak liu kompetisaun ne’e bele invlve mos ho munisipiu sira seluk mos, atu nu’une sira mos bele hetan oportunidade no hatudu sira nia talentu liliu iha modalidade ginástika ninian. fiar an katak ami bele hetan primeiru lugar ho esforsu ne’ebe mak durante ne’e ami treinu hamutuk, ami senti katak sei hetan valor ne’ebe mak diak”, dehan Nivia
Kompetisaun ba Dansa Ginástika ne’ebe realiza ho orsamentu total $5000, ne’ebe hetan apoiu hosi Diresaun Nasional Desportu edukasional no komunitaria.
