Reportazen Francisco JDA
Ema ho difisensia mak grupu ida ne’ebe vulneravel liu iha sosiedade, sira nia vulnerabilidade ne’e kauza hosi prosesu konstrusaun sosial ida ne’ebe maioria afeta hosi kiak, diskriminasaun, tratamentu aat, la dun iha oportunidade ba asesivel ba ema ho difisensia no abandonadu.
Hafoin Asosiasaun Difisensia Timor-Leste (ADTL) halao submisaun no rekomendasaun liu hosi media briefing ne’ebe organiza hosi Forum Organizasaun Naun Governamental Timor-Leste ( FONGTIL), esplika hosi Ofisial Advokasia ADTL, Veronica Tilman katak rezultadu sensus 2015 hatudu ema ho difisensia hamutuk nain 38.118 habitantes, maske tinan-tinan governu Timor-Leste aprova Orsamentu Jeral Estadu (OJE), dezenvolvimentu sustentavel ba hadia povu nia moris inklui sidadaun ne’ebe ho difisensia, governu Timor-Leste sura mos partisipasaun ema ho difisensia iha dezenvolvimentu.
“Husu ba VIII Governu Konstituisional hodi lalais prosesu ratifikasaun ba konvensaun ONU ba direitu ema ho difisensia (UN Convention on The right of person with disability) no estabelese konsellu nasional ema ho difisensia mak iha ona ezbosu dekretu lei, husi Ministériu Soliedariedade Sosial no Inkluzaun (MSSI) ne’ebe pendenti hela iha governasaun anterior, husu mos ba Presidente Republika wainhira promulga lei, programa governu liga ba OJE tenki hare mos ba leis artigus no kapitulus balun ne’ebe pelumenus temi ema ho difisensia”, hatete Ofisial Advokasia ADTL, Veronica Tilma iha Salaun FONGTIL, 24/11
ADTL husu ba Secretaria Esradu Igualdade no Inklusaun (SEII) atu promove diak liu tan partisipasaun feto ho difisensia nia aspirasaun, liu hosi involve feto ho difisensia iha eventu nasional no internasionál hotu feto nian, tenki tau atensaun aas ba feto ho difisensia, liuliu involvimentu iha atividade dezenvolvimentu nasional, tau mos osan ba iha selebrasaun loron mundiál ema ho difisensia ne’ebe mak kada tinan halao iha 3 Dezembru.
“Husu Ba entidades governantes hotu atu inklui no involve ema ho difisensia iha prosesu dezenvolvimentu nasional, hahú hosi inísiu planeamentu to’o implementasaun no evaluasaun, nune’e bele rona ema ho difisensia sira nia lian inklui hola parte foti dezisaun”, dehan Veronica Tilman.
