Home Notisia Treinadora Desportu Bola Aidilia Iha Liquisa, Rigoberta: Espera Bola Aidila Bele Famouza...

Treinadora Desportu Bola Aidilia Iha Liquisa, Rigoberta: Espera Bola Aidila Bele Famouza Iha Timor

496
0
foto sorin bola aidila (Rugby), foto liman los jornalista Neon Metin dadalia ho Rigoberta. [Foto: Zevonia Vieira | 30.11.2020]

Reportazen Adroaldo ‘Saretukau’

“Kontente tebes ho esperiensia foun ne’e, tanba laos aprende deit oinsa joga bola aidila, maibe hanorin labarik sira konaba abilidade moris, disiplina no halo diskusaun ho jogador sira konaba abilidade moris”. Rigoberta

Kondisaun ekonomia halo ema barak desidi hodi hili dalan ne’ebe prioridade liu, desidi atu hatutan moris. Dalabarak akontese hili harii ekonomia uma laran, maske dalan sei nurak atu atinji mehi hanesan jovem ida, maibe mehi nee dalaruma tenke savi metin, tanba laiha dalan seluk.

Jornalista Neon Metin hasoru malu jovem ida hosi Municipiu Liquisa, hela iha suku Lauhata, postu Bazartete. Jovem ida ne’ebe iha abilidade foun ida ba nia mak nudar treinadora ba desportu Bola Aidila ka konnesidu ho naran Rugby.

Hakfodak bainhira nia temi ne’e ba ekipa Neon Metin, admira jovem ne’ebe dalabarak soe nia tempu hodi halo nia negosiu kiik faan sate manu, maibe nia mos hanesan treinadora ida ba depsortu ne’ebe sei foun los iha Timor-Leste no barak mak seidauk abetua ka hatene desportu refere, sim iha nasaun sira seluk Bola Aidila konnesidu tebes maibe iha Timor presiza tempu.

Nia mak Rigoberta dos Santos Fátima, ba Neon Metin konfesa katak nia formadora desportu Bola Aidilia iha Liquisa, esperiensia no abilidade ne’ebe nia iha hetan hosi organizasaun Child Fund.

“Antes ne’e ha’u la Kontinua eskola maibé ha’u fo treinu labarik sira konabá bola ai-dila (Rugby), maibe Surtu COVID-19 ne’e mosu mak hau paradu tiha, tanba ha’u hanorin labarik sira ne’e halibur ema barak, entaun hau ho ha’u nia jogador sira tenki para, ami ema ida-idak la’o ni-nian,” nia haktuir nia istoria ne’e ba Neon Metin iha selebrasaun loron proklamasaun independensia ba dala 45, iha Lauhata, 28/11.

Rigoberta antuziasmu tebes ho desportu bola aidila, bainhira Child Fund fahe informasaun no priense folmulariu no ikus Child Fund selekta nia atu atu sai treinador, ho espiritu voluntarismu hanorin labarik sira atu oinsa joga bola aidila.

Rigoberta kaer ekipa haat durante nia fo formasaun, maske ho salariu naton maibe Rigoberta konfesa katak kontente tebes ho esperiensia foun ne’e, tanba laos aprende deit oinsa joga bola aidila, maibe hanorin labarik sira konaba abilidade moris, disiplina no halo diskusaun ho jogador sira konaba abilidade moris.

Treinador sira Filipina mak hanorin Rigoberta ho treinador sira seluk konaba bola aidila, maibe ba Neon Metin Rigoberta dehan treinador sira fila ona ba sira nia rain tanba COVID-19.

Rigoberta ho treinador sira seluk halo ona esforsu, hatoo proposta ba Sekretariu Estadu Juventude Desportu (SEJD) maibe to’o ohin loron sedauk hetan rezultadu

“Foin da-dauk iha fulan Septembru nia laran, ami ba aprezenta tiha iha SEJD, aprezenta konabá jogu ni-nia lala’ok, ami esplika maibé to’o agora seidauk rona rejultadu parese tinan oin karik”, hateten Rigoberta.

Bainhira Neon Metin husu apoiu saida mak ekipa treinador sira hakarak hetan hosi governu? Ba Neon Metin treinadora ne’e hateten ho esperansa boot ba oin governu bele apoiu desportu bola aidila ne’e bele sai konnesidu iha Timor

“Ami hakarak ami nia jogu ne’e tama iha desportu Timor-Leste. Foin primeira vez harii jogu ida ne’e, formador mai hosi Austrália ho Filipina, só hosi de’it munisípiu Liquisa mak hetan konabá jogu bola ai-dila ne’e”, nia hateten nakonu ho esperansa karik mehi ne’e bele atinji.

Nia husu ba SEJD  kria desportu bola ai-dila, nune’e bele espalla iha munisípiu ka suku hotu, tanba iha jogu ne’e ita aprende konaba abilidade ba moris, aprende valor sira moris nian, saída mak respeitu, disiplina, solidariedade, integridade no paixaun.

Interesante bainhira Rigoberta haktuir bainhira nia treina labarik sira mai ho diversidade katak jogu inkluzivu tanba inklui labarik ho difisiensia, la hare ba sexu, la hare ba relijiaun, la hare ba relasaun familia maibe iha jogu ne’e hanorin solidu, komprende malu no respeita malu.

Total partisipante ne’ebe tuir treinu desportu refere hamutuk 400 resin no treinador hamutuk 28, feto liu 10 resin. Treinu ne’ebe hahu hosi 2009, konsege halo kompetisaun dala haat no iha mos jogu amizade.  Jogador sira tuir kategoria ne’ebe iha katak iha sub 11-13 no sub 14-16.

Rigoberta haksolok ho abilidade ne’ebe mak nia iha ona, maibe iha parte seluk nia triste tanba labele kontinua nia eskola iha universidade, tanba ekonomia la premiti nia atu kontinua iha nivel universitariu, ba Neon Metin nia konfesa katak sekarik iha osan no kontinua ba universidade, nia hakarak eskola siensia desportu, hodi nune’e bele aumenta nia abilidade konaba desportu no sai treinador professional iha nia rain Liquisa.

Ho nune’e nia desidi halo negosiu kiik atu bele hetan netik dollar ida hodi tulun nia uma laran, sa tan ho situasaun COVID-19, formasaun desportu aidila la lao, nia fo prioridade liu ba buka moris.

Rigoberta Liquisa ana iha mehi boot ida hodi halo famouza desportu bola aidila iha Timor laran tomak, karik nia iha mos mehi ida Liquisa bele sai sidade desportu bola aidila tanba hahu hosi Liquisa. Ho loron proklamasaun independensia ba dala 45, ho espiritu jovem nian governu bele realiza nia mehi no Rigoberta bele sai heroina ba desportu aidila iha Timor-Leste.

Print Friendly, PDF & Email

LEAVE A REPLY

Please enter your comment!
Please enter your name here