Reportazen Francisco JDA
“Se Governu ka PNTL fo ultimatum ami sai, ami atu bá hela fali iha ne’ebé, tanba ne’e se hakarak kria dezenvolvimentu ne’e tenki mós kria kondisaun ba povu”. Maria Expostu
Komunidade Afeitadu suku Kaikoli, aldeia 01, hamutuk uma kain 11 prontu koopera ho entidade benifisiariu, hodi hala’o dezenvolvimentu ba konstrusaun edifisiu foun Polísia Nasionál Timor-Leste (PNTL) maibé tenki tuir dalan legal no tuir lei artigu 8 ba espropiasaun.
Hafoin komunidade afetadu suku Kaikoli hamutuk ho Rede ba Rai hala’o konferensia imprensa, ba jornalista sira Porta Voz komunidade afeitadu Kaikoli, Rogerio Marcal hateten, “ami rezeita totál deklarasaun husi komisariu PNTL Dr. Faustino da Costa tanba iha prosesu negosiasaun dala barak ona maibé seidauk iha akordu kona ba valor indeminizasaun ba ami nia propriedade.
“Ami konsidera deklarasaun husi komisariu PNTL Faustino da Costa forma ameasa no teror hanesan atu halo abuzu ba poder no la iha sentidu umanidade, tan ema hotu sofre hela kuensekuensia husi estadu emergencia no hasoru difikuldade ekonomia oin-oin hosi situasaun difisil ba pandemia COVID-19, komunidade uma kain 11 sei la hakruk ba kualker orden ilegal no ami sei la hamamuk ami nia rai no uma hela fatin, wainhira governu la halo tuir prosedimentu lei no 8/2017 kona ba lei”, dehan Rogerio
Nia dehan espropiasaun tanba utulidade públiku iha artigu 41 rekejitu previu ba pose admistrativu.
Iha fatin hanesan Koordenador Nasionál Rede ba Rai (RbR), Hortencio Pedro hateten prosesu nee la’o la tur lei espropiasaun, tanba bainhira hasai ema hosi fatin ida, projetu nain presiza halo realojamentu ba sira ka prepara fatin ida pelumenus uma ne’ebé sira hela ba, maibé bainhira atu dudu sai ema presiza tetu halo didiak, tanba se muda sai sira bá hela fali iha ne’ebé, ida ne’e mak presiza hare no tetu didiak
Iha fatin hanesan Komunidade afeitadu Suku Kaikoli, Maria expostu haktuir katak se Governu ka PNTL fo ultimatum ami sai, ami atu bá hela fali iha ne’ebé, tanba ne’e se hakarak kria dezenvolvimentu ne’e tenki mós kria kondisaun ba povu.
“Ita hotu iha lei nia okos halo oinsá mak atu dudu sai de’it ema ida, ne’e labele ita hotu tenki ser hakruk ba lei se prepara fatin ne’ebé mak dignu ami prontu sai”, hateten Maria Expostu
