Reportazen Santina Lucia da Costa
Instituisaun Falintil-Forsas Defeza Timor-Leste (F-FDTL) ohin loron hasoru problema finanseiru, ba jornalista sira Xefe Estadu Maiór Jenerál Falintil-Forsa Defeza Timor-Leste (F-FDTL), Majór Jenerál Lere Anan Timur informa katak instituisaun F-FDTL laiha orsamentu durane fulan rua liu ona.
Nia dehan F-FDTL nian problema mak Forsa tenke han, tenke iha roupa transporte, operasional no administrativu, tenki iha kilat no infrastrutura, “hau bele dehan katak, ate agora Forsa laiha osan ransu (osan ba hahan nian) durante fulan rua ona atu ba fulan tolu”.
Lere Anan Timur hatutan Ministru Defeza hatene katak F-FDTL tenke han, liu-liu afeita ba Forsa sira iha fronteira, “entaun ami dez-araska hanesan uluk iha gerilla ninian karik, ne’e ita nia kabun mamuk buka para han ida ne’e mak ami halo”.
“Jeneral halo hodi rezolve nesesidade ne’e mak deve mos di’ak, Timor oan hotu hamlaha, Forsa mos hamlaha ona, agora deve hela, fos mos deve, mina mos deve, tabaku mos deve. Ema dehan deve ne’e laos hau Lere mak deve, F-FDTL mak deve”, hateten Lere Anan Timur iha palacio prezidensia, hafoin hasoru malu ho Prezidente Republika, 10/02.
Entretantu kona-ba harii postu iha fronteira, Lere akresenta, ema kontinua tama ilegal, Forsa sira agora komesa kria kondisaun tanba ita nia ema ba iha ne’eba mos tenke iha uma, la bele ba tau iha ai-hun ka fatuk kuak tanba sira mós ema, sira mos iha moral, sira mos iha feen no oan, “ba tau sira iha ne’eba tanba interese ema barak nian, nia sakrifika nia-an ida ne’e mos la bele, tenki haree mos sira nia situasaun”.
