Reportajen Silvino Freitas
Core Group Transparency (CGT) konsidera fundu klimatika neebe governu no ajensia implementador sira implementa hodi finansia impaktu mudansa klimatika maioria halo uza fali ba buat seluk maibe la benefisia vitima impaktu husi mudansa klimatika tanba husi sira nia monitorizasaun la haree programa sira neebe halo iha relatoriu.
Koordenador CGT Jimicarter dos Reis dehan, finansiamentu klimatika nee importante tebes atu sosiedade sivil no media sira bele hatene hodi bele iha konesementu atu bele halo monitorizasaun ba orsamentu neebe fo apoiu ba finasiamentu klimatika neebe hahu husi 2008 husi global environment facility nee hamutuk milaun 92 dolares amerikanu, maibe husi osan refere laiha ema ruma mak halo tracking maibe iha 2021 sira konsege halo tracking maibe kuaze laiha benefisiu ba vitima neebe impaktu husi mudansa klimatika.
“hanesan ita hotu hatene media, akademiku no sosiedade-sivil hola papel importante tebes atu bele buka tuir informasaun sira nomos bele hetan lalaok finansiamentu klimatika mai ita nia rain” dehan Koordenador CGT Jimicarter dos Reis iha salaun Yayasan HAK Farol, (10/03).
Nia dehan tan, timor leste nasaun neebe ninia kontribuisaun ba emisaun mudansa-klimatika nee kiik maibe simu imapktu neebe boot tebes hanesan iha siklone seroja neebe akontese iha tinan 2021 rezulta komunidade sira tenke evakua lakon sira nia hela fatin inklui komunidade balun tenke lakon vida, tanba nee governu sosiedade-sivil sira iha papel neebe importante tebes atu komunidade sira kontinua kuidade ambiente atu labele akontese tan vitima ba mudansa-klimatika tanba mudansa-klimatika nia impaktu nee implika liu ba agrikultura, feto sira la’o do’ok buka bee-moos no ema ho difisiensia.
“tuir loloos orsamentu nee mai atu halo mitigasaun no adaptasaun maibe ajensia internasional sira uza fali ba halo imprestimu no nia benefisiu mos laos ba kumunidade, ita halo tracking ba komunidade liuliu autoridade lokal sira la hatene konaba ida nee tanba tuir loloos finansiamentu klimatika nee mai timor tenke fo benefisiu direta ba komunidade neebe afeta direta ba mudansa klimatika” dehan Koordenador Jimicarter.
Nia konklui, sira halo ona rekomendasaun ba parte governu atu bele hao monitorizasaun no kontrola nafatin ba orsamentu sira neebe finansia ba mudansa klimatika nunee governu implementa ona balun, tanba nee iha 2021 sira konsege halo tracking neebe deskobre lacuna barak nunee sira halo kart aba ajensia implementador sira inklui governu mais laiha resposta ba preokupasaun sira neebe CGT submete, tanba husi relatorio neebe ajensia implementador sira halo ikus CGT halo monitorizasaun sira la hetan implementa iha relatoriu.
