Reportazen Santina Lucia da Costa
Ekipa husi organizasaun sosiedade sivil ne’ebé kompostu husi plataforma nasional bee no saneamentu, Asosiasaun Halibur Defisiensia Matan Timor-Leste (AHDMTL), Ra’es Hadomi Timor Oan (RHTO) ho grupu feto foinsa’e hasoru Prezidente Republika, Dr.Francisco Guterres Lu-Olo hodi relata asuntu bee no saneamentu ijiene ne’ebé maka inkluzivu ba ema ho defisiensia.
Hafoin enkontru Diretor Ezekutivu RHTO, Joaozito dos Santos nudar porta voz ba jornalista katak, asuntus liga ba ema ho defisiensia kona-ba justisa, saude, edukasaun ita hotu hatene katak ema ho defisiensa barak tebes mak seidauk asesu no partisipa ba dezenvolvimentu nasional, rai laran nian, Orsamentu Jeral Estadu (OJE) nian ne’ebe aloka tau masimu no sufisiente ba area difisiensia.
Diretor Ezekutivu RHTO hateten ita hotu hatene katak iha direitu hanesan asesu bee no saneamentu hakerek mós iha Konstituisaun maibe realidade fasilidade ba saneamentu publiku sira la asesivel, asesibilidade iha fatin publiku sira seidauk responde ba nesesidade moris.
“Ita iha ona despacho Ministeriu Obras Publikas nian husu para kompania ka konstrusaun hotu tenki asesivel ba ema ho defisiensia, maibé nia implementasaun ne’e tenki iha, hirak sira ne’e sai nafatin preokupasaun tanba realidade ema ho defisiensia sira seidauk asesu masimu ba bee no saneamentu”, dehan Joaizito
Nia dehan Prezidente Republika konkorda no konsidera katak, laos de’it ema ho defisiensia, governu preokupa de’it ba uma, estrada maibé nesesidade baziku bee no sanesamentu saude, justisa, edukasaun hirak ne’e sei sai hanesan problema boot ida.
Nia konklui katak Prezidente Republika aseita tebes ho asuntu sira ne’e, tanba realidade ida ne’e mak akontese iha komunidade, se mosu mos diskriminasaun oinoin hasoru ba ema ho defisiensia.
“Ita nia estadu no governu tenki halo dezenvolvimentu ida inkluzivu labele husik ema ida iha kotuk”, hateten Joãozito dos Santos ba jornalista sira iha Palasiu Prezidensial Nicolau-Lobato, Bairo-Pite, 10/2.
