Reportazen Santina Lucia da Costa
Prezidente Republika Dr. Francisco Guterres Lu-Olo halo enkontru ho membru Konsellu Superior Defeza no Seguransa (KSDS) ho Konsellu Estadu (KE) fó apoiu tomak atu extende tan Estadu Emerjensia (EE) ba dala-11, relasiona ho COVID-19 ne’ebe kontamina iha lokal.
Hafoin enkontruba jornalista sira Xefe Casa Sivil, Francisco Maria de Vasconselhos informa katak ohin reuniaun Konsellu rua ne’e rekomenda ba Prezidente Republika halo pedidu ba Parlamentu Nasional hodi halo extensaun ba Estadu Emerjensia.
“Konsellu Superior Defeza no Seguransa ho Konsellu Estadu rekomenda ba Prezidente Republika ohin, se lae aban dadersan Prezidente Republika sei haruka pedidu governu nian ba Parlamentu Nasional, hodi diskute no aprova depois Prezidente Republika bele dekreta”, hateten Xefe Casa Sivil, Francisco Maria de Vasconselhos iha Palasiu Prezidensial Nicolau-Lobato, Bairu-Pite, 24/2.
Xefe Casa Sivil dehan medidas nafatin hanesan Estadu Emerjensia ida uluk, só iha tan ida maka husi Forsas sei apoiu Forsa Defeza para atu apoiu serbisu iha fronteira. Kona-ba eskola sira taka ne’e ida ne’e sei diskute, depois Parlamentu Nasional aprova tiha depois mak governu halo dekretu ida para halo medidas saida mak bele aplika iha teritoriu tomak, inklui Covalima, Bobonaro ho Rejiaun Espesial Oe-cusse
Iha fatin hanesan Diretór Ezekutivu FONGTIL, Daniel do Santos hateten Prezidente Republika konvida tuir enkontru hanesan observadór ba Prezidente Republika hanesan konsulta ba KSDS ho KE oinsa atu halo extensaun ba Estadu Emerjensia.
“Opiniaun Sosiedade Sivil ba reuniaunmak ita iha pozisaun haat hanesan apoiu total proposta husi governu nian, para atu deklara Estadu Emerjensia ba dala-11, tuir pedidu ne’e atu hasa’e tan nia medida sira regurozu, liu-liu liberdade demonstrasaun, liberdade reuniaun”, esplika Daniel dos Santos.
Nia hatutan prevensaun ne’e halo nafatin tanba buat ne’e iha ona kontaminasaun iha lokál, maibe tenki halo buat seluk, aselera vasina, sosa vasina halo vasina ba sidadaun sira ne’e importante, ema barak sei kestiona nia efeitu husi vasina ne’e, maibé tenki fiar rekomendasaun Organizasaun Mundial Saude (OMS).
Daniel dos Santos dehan tan wainhira serka sanitaria iha munisipiu sira iha fronteira ne’e, ita husu ba governu asegura nesesidade baziku ba populasaun no ikus liu mak oinsa atu halo teste massal ne’e, ba Munisipiu sira ne’e tenki halo hotu.
