Reportajen Estajiada Agustinha Amaral
Servisu Saúde Munisípiu Díli (SSMD) rejistu kazu dengue hamutuk 17 iha Postu Administrativu haat, Munisípiu Díli, aumenta sa’e iha semana tolu liu ba.
“Agora da-dauk Servisu Saúde Munisípiu Díli rejistu kazu dengue hamutuk iha 17 kazu ne’ebé maka ita iha, ne’e duni husi kazu dengue 17 ne’ebé mak ami rejistu iha Kapital Díli ne’e hotu-hotu rekupera”, Diretora SSM-Díli, Maria Seguradu dehan iha Timor Plaza, Maubara Room, Kuarta-feira, 18/01.
Nia dehan, kazu dengue ne’ebé mak sa’e nafatin iha kapital Díli, liu-liu iha Postu Administivu haat maka hanesan Postu Administivu Dom-Aleixo iha Suku Komoro nian maka númeru aas, tuir fali mak, Veira-Kruz, Na’in Feto no Kristu Rei iha Suku Bekora.
Tanba ne’e sira kompara rejistu kazu dengue ho tinan kotuk, haree ba ninia siklus, tinan kotuk aas liu iha tinan ida ne’e.
“Ho ida ni-nia intervensaun iha nafatin husi ita nia ekipa edukasaun saúde ni-nian, depois destruisaun kímiku ba iha kombate susuk ne’e, nomos ita atende nafatin sira ne’ebé maka hetan ona dengue ba iha fomiliasaun direita,” nia hatete.
Enkuantu ba fatin preparasaun atendimentu Bairu Klínika Tasi-Tolu sira, atu prepara ba antipasaun iha uma monu rai no dezastre naturais sira, prepara hela kondisaun ne’ebé mak haree rasik iha fasilidade saúde, maibé iha mos fasilidade Tasi-Tolu ne’ebé mak iha kondisaun menus maibé ida alternativu ba iha Sentru Saúde sira hotu liu-liu iha Sentru Saúde Komoro.
“Iha Sentru Saúde Komoro maka ita hare espasu kama 10 ne’e maka la sufisiente no mos refere fali mai iha Veira-Kruz maka labele ona, alternativu ikus sira haree fila fali Tasi-Tolu,” Diretora ne’e informa.
Ba Fasilidade iha ne’ebá, iha tolu kedas ne’ebe hanesan fasilidade A,B no C, ne’ebé iha A maka kondisaun la di’ak no B ho C iha kondisaun hodi bele alerta karik iha kazu ruma.
