Reportajen Joanina Casamiro
Prezidente Autoridade Munisípiu Díli (PAMD), servisu hamutuk ho Autoridade lokal Suku 31 iha Munisípiu Díli, realiza Programa konsultasaun adezaun Timor-Leste ba Organizasaun Mundiál Komérsiu (OMK) iha nível Munisipal.
Iha enkontru ne’e, Prezidente Autoridade Munisipiu Dili, Guilhermina Filomena Saldanha hatete, Díli hanesan kapital nasaun nian, maibé ita nafatin hasoru problema barak, tanba ne’e mak presiza konsultasaun hosi autoridade lokal Munisipal konabá adezaun Timor-Leste nian ba OMK.
“Ita presiza tebes ho konsultasaun no hein kontribuisaun di’ak hosi parte Munisípiu nian, liu-liu Administrador Postu nomos Xefe Suku sira katak, iha relevansia ho konsultasaun ida ne’e, sira tenke iha kontribuisaun atu bele ba oin,” dehan Prezidente Autoridade Munisipiu Dili, iha Edifísiu Munisipal Dili, 18/01.
Nia dehan bainhira Timor-Leste adere ba organizasaun OMK, presiza hadi’a mos polítika sira, entaun ita mos halo preparasaun haree ba ita nia uma laran, tanba Dili hanesan munisípiu no kapital nasaun nian, entaun ita tenke iha responsabilidade.
“Ha’u hanoin konsultasaun ne’e importante atu ita halo, la’os de’it iha nível munisipal maibé ita mos presiza rona mos ita nia komunidade sira, karik konstituisaun ne’e importante tebes atu nune’e ita bele foti buat ruma ne’ebé di’ak liu ba oin,” nia hato’o.
