Reportajen Joselina dos Santos
Komunidade uma-kain lima iha Suku Lahane Oriental, Postu-Administrativu Na’in Feto, Munisípiu Dili ne’ebé hetan afeta hosi dezastre naturais iha Dezembru 2022 no Janeiru 2023, seidauk hetan material konstrusaun ba sira nia uma.
Xefi Suku Lahane Oriental, Trindade do A. P. Baptista hatete, komunidade uma-kain lima mak sai vítima ba dezastre naturais ne’ebé akontese iha fulan kotuk, barak mak hetan ona apoiu maibé apoiu ai-han de’it, seidauk hetan material atu bele halo konstrusaun ba sira nia uma. Entre uma-kain lima ne’e uma kain rua husi aldeia Temporal ho aldeia Tuba Rai mak hetan ona apoiu husi Protesaun Sivil ba emerjénsia ai-han nian.
“Família afetadu dezastre naturais sira ne’e la evakua ba fatin seluk, maibé balun ne’ebé uma la aproveita, sira tenke tahan hodi hela hamutuk ho viziñu nia uma, no balun prega rasik sira nia uma hodi bele fó espasu ba sira nia moris,” dehan Xefi Suku Lahane Oriental ba Neon Metin iha Edifísiu Munisipal Dili, 18/01.
Autoridade komunitáriu ne’e informa, bainhira dezastre ne’e akontese nia kontaktu kedas ho Autoridade Protesaun Sivil, inklui to’o kedas fatin akontesimentu. Entre vítima sira ne’e aldeia tolu hanesan aldeia Sare, Rai Mean no Suhu Rama mak seidauk hetan atendimentu tanba Protesaun Sivil sei haree no halo atendimentu ba komunidade Hera ne’ebé sofre mos dezastre naturais ne’ebé grave, maibé la signifika sira husik komunidade afetadu sira.
“Husu ba Governu tenke tau matan ho lalais ba povu ne’ebé sofre husi dezastre naturais ne’e labele burokrasia demais, tanba sira tuur iha Parlamentu ne’e, ne’e povu mak hili, la’os sira na’in mesak ba tuur iha Parlamentu, nune’e la’os ko’alia konabá polítiku no kor partidu nian maibé tenke haree mos ba situasaun sira ne’ebé povu enfrenta,” nia salienta.
