Reportajen David da Costa Gusmão
Loron Mundiál ba Feto nian, iha tinan ne’e ho tema jerál “Inovasaun Dijitálidade no Teknolojia ba Jeneru ida ne’ebé kualidade” ho ida ne’e Governu Timor-Leste hato’o parabens ba feto Timor-Leste, no governu mós rekoñese katak partisipasaun feto nian ba envolvimentu iha prosesu dezenvolvimentu, sei iha dalan ne’ebé naruk, atu bele to’o iha nia objetivu finál.
“Ha’u hakarak lori VIII Governu nia naran fó parabens ba feto Timoroan sira hotu, ba loron mundiál feto nian,” hato’o husi Porta Voz Governu, Ministru Prezidénsia Konsellu Ministru Fidélis Mangalhães, iha Palásiu Governu, Kuarta 8/03.
Nia haktuir, Loron ida ne’e, fó hanoin fila fali ho objetivu sira ba ukun rasik kaan nian, ne’ebé maka hakarak atu kria kondisaun ida ba moris ida ne’ebé ho dignu ba Timoroan sira feto no mane.
“Maibé ita rekoñese katak ba partisipasaun feto nian no ba envolvimentu feto nian iha prosesu dezenvolvimentu sei iha dalan ne’ebé naruk, atu bele to’o iha ita nia objetivu finál,” hateten Fidélis.
Ho ida ne’e, Governu fiar katak husi tinan ba tinan governu halo meloramentu, investimentu no fó oportunidade sira ne’ebé hanesan ba maluk feto sira. No fiar katak instituisaun estadu sira nia hotu, kontinua sensivel ba promosaun ba partisipasaun feto iha vida politika, ekonomia, social iha Timor-Leste.
