Home Notisia RD Konfesa Dala 3, Pe. Gregor SVD Hatete “Klaru Ona no Publika...

RD Konfesa Dala 3, Pe. Gregor SVD Hatete “Klaru Ona no Publika iha Tempo Timor, Lusa no UCA News”

971
0
Situasaun julgamentu kazu Topu Honis iha tribunal Oe-cusse, 23/02. [Foto: David da Costa | 23.02.2021]

Semana ida liuba, The Oecusse Post (20/03) fo sai informasaun katak Richard Baschbach (RD) nia konfesa ne’e tan iha presaun balun. Ba ida ne’e Neon Metin koko buka hikas konfirmasaun hosi SVD Regional Timor-Leste nian. 

Ba Neon Metin, liu hosi konfirmasaun mak hato’o hosi WhatsApp, Sekretariu SVD, Gregory Minz, hatete katak Richard Dascbach nia konfesa klaru ona no dokumenta tiha ona iha Ministeriu Publik.

“Buat hotu Klaru ona hanesan hakerek ona Iha Tempo Timor,  Lusa,  UCA,  etc. Buat hotu documenta tiha ona Iha Ministerio Publico, ne’e confidencial ministerio  nian,” Pe. Gregory hato’o ba Neon Metin, ohin, 26/03.

Richard Daschbach mos konfesa nia hahalok dala tolu ba ema no instituisaun la hanesan. Konfesa hirak ne’e publika iha notisia sira iha Tempo Timor (tempotimor.com) nian.

Notisia Tempo Timor publika (01/02/2019) konfesa ne’ebe Richard Daschbach halo ba Kongregasaun Dutrina Fe nian iha Vatikanu. Iha notisia ne’e hatete bainhira Superior Rejional SVD mak nia baze iha Timor-Leste, Pe. Yohanes Suban Gapun, simu informasaun kona ba abuzu sexual mak Richard Dasbach halo. SVD husu Richard Dascbach mai SVD nia fatin iha Dili hodi atende telefone hosi superior jeral iha Roma. Hatan ba husu hosi telefone katak nia (Richard Dascbach) halo duni ka lae hahalok ne’e, Richard Dasbach, hatan dehan “100 pursentu los”. Superior Regional SVD Timor-Leste nian ne’e rona duni nia hatete nune’e, “nia repete saida mak nia dehan dala hat”.

Iha notisia diferente ne’ebe Tempo Timor publika (8/03/2019), husu ba Richard Daschbach kona ba nia la kaer ka la book labarik sira? Nia hatan jornalista katak “ne’e hau nia privadu laos o nian”. Nia mos dehan katak “Hau nunka nega. Hau nunka konfirma”.

Ba doador ida mak apoio osan barak ba Topu Honis, Tony Hamilton, nia Richard Dascbach mos konfesa nia hahalok ne’e (Tempo Timor, 18 Outubru 2019)

Iha notisia ne’e Tony Hamilton esplika nia apoio no nia diskontentamentu ba kazu abuzu sexual mak akontese.  Iha Fevereiru 2018, bainhira Hamilton rona katak SVD hasai tiha ona Richard Daschbach hosi Topu Honis. Hamilton hakarak atu komprende tan sa, no hetan informasaun katak nia (Richard Daschbach) halo abuzu sexual ba labarik feto sira mak nia rasik hakiak.

“Fofoun hau hanoin akuzasaun ne’e susar atu fiar. Iha fulan Abril 2018 hau desidi visita Richard iha Dili. Iha vizita ida ne’e hau hasoru Richard iha okaziaun diferente tolu, iha okaziaun rua nia admiti mai hau katak nia halo duni abuzu sexual labarik feto sira iha Kutet, nia abuzu duni sira no halo tiha ona ida ne’e ba tempu naruk,” Hamilton haktuir iha nia karta laran.

“Bainhira hau husu nia, nia iha remorse ka arepende ba saida mak nia halo tiha ona, nia hatete ba hau dehan LAE, tan nia mak hanesan ne’e tiha ona. Saida mak nia dehan mak shokadu ba hau, ne’e harahun hau nia domin no respeitu ba nia. Laos deit tan nia hahalok ne’e halo hau sente la gosta maibe tan laos deit saida mak nia halo ne’e malvadu maibe mos krimi seriu”, Hamilton esplika tuir saida mak Richard Daschbach hatete ba nia iha sira nia hasoru malu.

Ba Hamilton saida mak Richard Daschbach konfesa ba nia afeta labarik feto barak iha Topu Honis. Doador expresa katak nia la iha opsaun, nia tenke keisa saida mak Richard konfesa ona ba autoridade.

Richard hatete buat sira ne’e ba Hamilton no Lili Tarung nia oin, atual  Diretora ba Topu Honis.

Kazu Topu Honis mak nudar kazu pedofilia ne’ebe mosu ba publik dahuluk iha Timor-Leste no kazu ne’e involve eis-Padre Richard Dascbach hosi kongregasaun SVD nian. Ho rezultadu investigasaun Kongregasaun Dutrina ba Fe nian iha Vatikanu, Richard Daschbach konfesa ona no Amo Papa Francisco hasai tiha ona Richard Dascbach nudar padre iha tinan 2018. Eis-Padre ne’e agora dadaun tuir hela prosesu justisa ho kondenasaun kazu pedofilia, pornografia labarik no violensia domestika.

Julgamentu ba kazu Topu Honis ne’ebe involve Richard Dascbach nudar arguido ne’ebe planu tiha ona ba halo iha 22 Marsu 2021. Maibe dadaun Dili iha situasaun lockdown. Arguido iha TIR iha Dili, vitima atu fo sasin mos iha Dili, prokurador mos iha Dili, no juis balun mos iha Dili. Ho razaun sira ne’e mak adia julgamentu kazu ne’e ba fulan Maiu 24 – 28 Maiu 2021.

Print Friendly, PDF & Email

LEAVE A REPLY

Please enter your comment!
Please enter your name here