Reportazen David da Costa Gusmao*
Estudante Front Mahasiswa Timor-Leste (TL) lamenta tebes ho aktu ne’ebé Polisia Nasional Timor Leste (PNTL) ho Falintil-Forsa Defesa Timor-Leste (F-FDTL) halo hasoru pasiente COVID-19 no sidadaun sira iha kuarantina munisipiu Manufahi.
Porta Voz FMTL, Francelina Piedade hateten ekipa liña frente no parte seguransa no defeza ne’ebé halo agregasaun baku no uza gás lacrimogêneo hasoru pasiente sira iha kuarantina, ne’e FMTL konsidera aktu refere la mostra profesionalizmu ekipa liña frente husi Centro Integradu Jestaun Krize (CIJK) no étika profesionalizmu seguransa no defeza nu’udar servidor estadu.
“Aktu ne’ebé komete husi PNTL hasoru pasiente COVID-19 no sidadaun sira iha kuarantina ne’e la kumpri dekretu lei nu.44/2020 de 7 de Outobru, kona ba regulamentu disiplinar PNTL iha artigu 8 deveres espesifikus no artigo 11 deveres profesionalismu,” dehan Porta voz, iha kampos UNTL kaikoli, 21/04.
Nia haktuir aktu ne’ebé komete husi PNTL no F-FDTL ne’e konsidera nu’udar krime, ne’ebé hatuur iha kódigu prosesu penal, artigu 145 ofensa ba integridade fizika simples.
“FMTL konsidera aktu hirak ne’e la mostra profesionalismu ekipa liña frente husi SIJK no etika profesionalismu seguransa no defeza nu’udar servidor estadu,tamba iha evidensia digitais (video recording) ne’ebé ema espalla iha media sosial no ida ne’e sei hamonu no halakon konfiansa povu ba nia seguransa no defeza estadu hanesan PNTL no FFDTL,” dehan Francelina
FMTL husu ba CIJK tenke toma medida ba aktu ne’ebé komete husi agente PNTL no Menbro FFDTL sira ho lei ne’ebé relevante ekipa front line, atu nune’e sira hala’o serbisu iha terrenu ne’ebé garante nafatin valores prinsipiu direitus humanus.
*(David da Costa Gusmao nudar estudante UNTL ne’ebe halo estajiu iha Neon Metin)
