Home Notisia Posko Soliedariedade Haburas Apoiu Ona Familia Afetadu Total 1500, Planu Sei To’o...

Posko Soliedariedade Haburas Apoiu Ona Familia Afetadu Total 1500, Planu Sei To’o Municipio

573
0
Posko Soliedaridade Haburs fahe nesesidade baziku. [Foto: Francisco JDA | 28.04.2021]

Reportazen Francisco JDA

Posko Soliedariedade Haburas ohin fó apoiu soliedariedade  ba komunidade ne’ebe afeta inundasaun iha Metiaut, aldeia 17 Abríl, maske durante ne’e hetan ona apoiu balun hosi loja no NGO sira maibe la to’o ba komunidade hotu, tanba komunidade barak mak hetan afetadu.

Tuir komunidade Afetadu suku Metiaut aldeia 17 Abríl, Paulino Varela informa katak, durante ne’e governu no NGO balun fo ona apoiu nesesidade emergencia maibé material konstrusaun mak seidauk, atu bele rekuperasaun fali uma ne’ebé mak at, ba futuru karik governu bele hadia netik bee dalan atu sa tan bee labele kona uma.

“Ha’u husu governu ba oin bele karik hadia netik bee dalan, fo netik material konstrusaun atu ami bele hadia fali ami nia uma, tanba dadaun ne’e ami sei ba hela iha eskola tanba uma aat hela,” hateten Paulino Varela iha Aldeia 17 Abríl, 28/04.

Iha fatin hanesan Koordenador Posko Soliedariedade Haburas, Pedro Hortencio Viera ba jornalista sira hateten, familia uma kain ne’ebé apoiu ona nesesidade bázika hamutuk umak 1500, la’ós de’it apoiu nesesidade bázika maibé mós tein ba família afetadu ne’ebé hela iha centru evakuasaun sira.

“Buat ne’ebé mak ami halo ne’e buat rua, premeiru semana ami tein hahán tasak, hodi oferese ba maluk sira ne’ebé desloka iha centro afetadu sira Becora, Metiaut, Hera, Metinaro no fatin seluk. Ami la’ós tein de’it maibé ami mós distribui sasán nesesidade bázika sira ne’ebé mak presiza duni, maibé ami mós  iha ona planu atu distribui nesesidade bázika ba municipiu sira, maibé tanba afetadu serka sanitaria entaun ami seidauk to’o ba iha ne’ebá, maibé tuir planu ami sei to’o ba municipiu sira,” hateten Hortencio Pedro Vieira

Nia dehan ema ne’ebé iha Posko Haburas ne’e mai hosi fatin oin-oin hanesan ema rezistensia, individual, loja nain no sira ne’ebé apoiu maneja no ajuda fahe sasán estudante universitariu sira  Raypen no Rayla. Hirak ne’e hotu serbisu voluntariu, atu oinsá nafatin tulun vitima sira iha tempu Inundasaun ne’ebé akontese ona.

Print Friendly, PDF & Email

LEAVE A REPLY

Please enter your comment!
Please enter your name here