Reportajen Francisco JDA
Ekipa Sekretario Exekutivu Comunidades Paises da Língua Portuguesa (CPLP) ohin hasoru Prezidente Parlamentu Nasionál (PPN), Aniceto Guterres hafoin governu rekomenda Zacarias Albano da Costa sai nu’udar Sekretario Executivu CPLP ba periodu tinan rua husi 2021-2023.
Hafoin hasoru malu ho Presidente Parlamentu Nasionál, Sekretario Executivu CPLP, Zacarias Albano ba jornalista sira hateten, ohin deskute situasaun barak inklui situasaun interna CPLP nian ne’ebé difisil entermus finansial, maibé oinsá mak Timor-Leste bele apoiu makaas durante Timor oan rasik mak kaer kargu nu’udar Secretario Exekutivu.
“La’ós ha’u mak atu susesu maibé Timor-Leste mak atu susesu, tanba ne’e rotativu no ita lakohi katak timoroan ida iha oin mak Secretario Executivu la la’o tanba problema finanseiru no polítika, maibé ha’u hakarak atu dehan durante enkontru ofisiál sira iha Timor-Leste ho orgaun soberania tolu, sira fó apoiu maximu tebes, tanba ne’e kandidatura ida konsensual no Timor nia naran mak sei ba iha ne’ebá,” hateten Sekretario Executivu CPLP Iha PN, 18/04
Nia reforsa tan ba oin Timor-Leste sei hetan vantajen boot iha partisipativu, ativu liu tan no bele mós influénsia iha agenda nia laran, nune’e Timor-Leste labele moris mesak hanesan nasaun, maibé tenki hola parte ba organizasaun nia laran, nune’e data fixu tomada posse ba Sekretario Executivu CPLP mak sei hala’o iha Luanda Angola iha loron 17 de Julho no asume kedas kargu Secretario Executivu CPLP.
“Ha’u simu posse iha Angola maibé hala’o ha’u nia knaar iha Lisboa, tanba Sekretario Executivu CPLP iha Lisboa, mas ha’u la iha agenda, maibé deside polítika mak Xefe Estadu no governu bainhira reuniaun iha Angola mak deside ha’u hanesan implementador de’it, nune’e Timor-Leste nia interese bele defende iha ne’ebá,” hateten Zacarias Albano
