“Figuras públikas ho responsabilidade labele hateten katak sira hadomi povu no preokupa ho moris-di’ak no saúde povu nian, maibé la kumpri fali regras bázikas ba protesaun hanesan distansiamentu sosial no uza máskara ka la respeita konfinamentu domisiliáriu, ho motivu ne’ebé de’it ka ho hanoin ba sira nia an de’it”. Prezidente Lu Olo
Prezidente Repúblika, Dr. Francisco Guterres Lú Olo, husu ema hotu kumpre regras hatuur durante Estadu Emerjénsia.
Iha mensajen ba Parlamentu Nasionál husu autorizasaun ba deklara
estadu emerjénsia dala ida tan, Xefe Estadu preokupa tebes ho númeru
kazu konfirmadu ho virus COVID-19 nian sae ba beibeik no diariamente
afeta ema liu atus ida. Tanba ne’e, tenke iha kbiit ruma atu hapara
tendénsia ida ne’e.
Liu hosi komunikadu imprensa ne’ebe Neon Metin asesu Prezidente Lu Olo hateten katak situasaun iha Timor-Leste preokupante tebetebes ohinloron. Bainhira Prezidente Repúblika hato’o mensájen ba Parlamentu Nasionál,
Timor-Leste iha hela kazu ativu konfirmadu 2666, husi total 6014 sura
hamutuk husi Marsu 2020 no ema na’in-14 mak moras todan, ho kauza
oin-oin no mate no iha mos vírus COVID-19 nian.
“Figuras públikas ho responsabilidade labele hateten katak sira hadomi
povu no preokupa ho moris-di’ak no saúde povu nian, maibé la kumpri
fali regras bázikas ba protesaun hanesan distansiamentu sosial no uza
máskara ka la respeita konfinamentu domisiliáriu, ho motivu ne’ebé
de’it ka ho hanoin ba sira nia an de’it”, dehan Lu Olo, 30/05.
Nia hatatutan halibur ho populasaun iha fatin públiku lahó máskara no lahó distansiamentu sosiál sei la kontribui atu hapara vírus corona maibé sei loke dalan ba vírus at ne’e hada’et liután husi ema ba ema.
“Saída mak populasaun hanoin ba nia obrigasaun atu haktuir konfinamentu domisiliáriu bainhira nia haree figura públika ida halibur ho ema ka la’o ba-mai ho ema atu haksolok-nia an de’it?”, Prezidente Repúblika hateten iha ninia mensájen ba Parlamentu Nasionál bainhira husu autorizasaun atu renova estadu emerjénsia hahú husi zero oras, 2 juñu 2021 (kuarta-feira) to’o 23 oras 59 minutus 1 Jullu 2021 (kuinta-feira), iha territóriu nasionál tomak”, dehan Prezidente Lu Olo
Prezidente Repúblika preokupa tebes bainhira populasaun la respeita
pesoál saúde ne’ebé tau matan no proteje sidadaun loron-loron. Futuru
saída mak País ne’e sei iha, bainhira ema la respeita forsas defeza no
seguransa? Futuru saída mak ita sei hetan ba foin-sa’e sira ne’ebé
fila kotuk ba siénsia no monu lalais ‘ ba teoria nega de’it no
ba konspirasaun no rumor ne’ebé sira lee iha media sosiál?
Prezidente Repúblika labele deklara fulan-fulan estadu emerjénsia no
husu hela de’it sakrifísiu husi ema maibé Governu la konsege
implementa medidas.
Prezidene Lu Olo hatoo ba governu labele hases-an husi sasukat ka medida sira ne’ebé nia rasik dekreta no labele mós husik grupu ne’ebé de’it hasees-an no la respeita medida hirak ne’e.
Governu labele ezije atu taka tipu estabelesimentu komersiál ruma no husik estabelesimentu balun husi tipu ne’e kontinua loke nafatin ba públiku. Governu labele dekreta konfinamentu domisiliáriu jerál aibé husik fali ema irresponsavel sira pratika
desportu, partisipa iha konsertu muzikál, halo serenata kalan, ka la’o bá-mai iha ema hotu-hotu nia oin no Polísia haree de’it.
Lu Olo dehan Repúblika Demokrátika Timor-Leste ne’e hatuur-an nu’udar Estadu direitu demokrátiku, soberanu, independente no unitáriu, bazeia ba
vontade popular no respeitu ba dignidade ema nian, tuir númeru 1
artigu 1 husi Konstituisaun. La respeita órden no instrusaun sira husi
autoridades kompetentes, hodi aplika normas ba implementa estadu
emerjénsia labele haree de’it ho perspetiva responsabilidade penal
husi nia infratór sira.
“Se ita loke dalan nafatin atu la halo tuir medidas implementasaun estadu emerjénsia entaun ita tau Estadu-de-Direitu ne’e en-kauza. Ita tenke proteje Estadu-de-Direitu
no kombate ameasa hotu-hotu ne’ebé mosu hasoru Estadu ne’e. Bainhira
ita fó-dalan ba ema la respeita direitu, ita sei permite barbarizmu
moris,” dehan Prezidente Repúblika hato’o iha nia mensajen ba Parlamentu
Nasionál.
Prezidente Repúblika fiar katak ho apoiu ema hotu nian, Timor-Leste
sei hakaat liu dezafiu boot no difisil ida ne’e. Iha istória
Timor-Leste nian iha ezemplu oioin ne’ebé hatudu katak bainhira ita
hamutuk, ita bele hakaat dezafiu.
