Reportajen Zevonia Vieira
Ohin loron 5 Jullu julgamentu ba kazu Topu Honis sei halao iha tribunal distritál Oe-usse. Liu hosi telefone ba Neon Metin Prokurador Titular ba kazu Topu Honis, Dr. Matias Soares hateten tuir planu sei hahu iha oras tuku 09:00 dadersan.
Tuir Dr. Matias Soares katak parte arguido no vítima nian sira hotu kompletu hodi partisipa iha prosesu julgamentu
“RD mos iha, ema hotu kompletu, vítima sira kuaze kompletu, testemuña notifikadu hotu, ne’ebe mak hela iha Oe-cusse, hela iha fatin seluk, hela iha estranjeiru sira notifkadu hotu kedas”, dehan Dr. Matias via telefone ba Neon Metin, 05/07.
Karik sira ne’ebe hela iha estranjeiru sei hatoo sira nia sasin via video call? Ba Neon Metin Prokuradór Titular ba kazu Topu Honis ne’e hatan katak, ida ne’e mak sedauk hatene loloos, maibe sei hatene orsida oinsá nia prosesu.
“Sera que sira ne’ebe hela iha Australia sei uza video conference ou sira balun hakarak mai Timor-Leste, ida seluk ne’ebe hela iha Amerika karik uza video conference ou sira hakarak mai Timor-Leste. Ida ne’e ami sedauk hatene loloos, orsida mak ami foin hatene”, Dr. Matias informa.
Dr. Matias informa katak iha julgamentu ohin loron nian, vítima nain neen (6) mak sei hatoo sira nia sasin, balun mai hosi Dili, balun hela iha Oe-cusse, “maibe agora dadauk sira hotu iha Oe-cusse ona”.
Tuir planua julgamentu sei hahu hosi loron 5 to’o 30 Jullu, “ida ne’e markadu hotu kedas, katak julgamentu sei halao lor-loron”.
Prosesu julgamentu ba kazu Topu Honis adia bebeikona ba dala haat (4) no ohin loron 5 Jullu sei hahu fila fali. Kazu Topu Honis mak nudar kazu pedofilia ne’ebe mosu dahuluk ih Timor-Leste, invole hosi eis padre RD hosi kongregasaun Society of the Divine Word (SVD), no RD hetan konfirmasaun kazu abuzu sexual, violensia domestika no pornografia labarik.
