Home Justisa Seidauk Iha Solusaun ba Kazu Rai Sidade Universitariu Aileu, RbR Prontu Lori...

Seidauk Iha Solusaun ba Kazu Rai Sidade Universitariu Aileu, RbR Prontu Lori ba Tribunal

1835
0
Komunidade nain ba rai iha Aileu ho RbR halo dialogu ho governu. [Foto: Media RbR | 26.07.2021]

Reportazen Renato Oliveira

Komunidade afetadu sidade universitáriu Aileu hamutuk ho ekipa Rede ba Rai (RbR)  ho HASATIL  hasoru malu ho Ministériu Ensinu Superior Siénsia e Kultura no Ministériu Justisa (Diresaun Nasional Terras e Propriedade).

Iha sorumutu ne’e ho objetivu hodi hasoru malu parte entidade benefisiária no komunidade afetadu sira, tanba maski prosesu husi implementasaun kriasaun sidade universitáriu to’o ona iha faze implementasaun, maibé komunidade afetadu sira la satisfás ho implementasaun projetu ne’e, tanba la iha konsiderasaun ba sira.

Komunidade afetadu, Getrudes Soares sente la satisfás ho kriasaun husi sidade universitáriu, tanba mekanizmu aprosimasaun husi entidade benefisiáriu ne’ebé mak ho presaun no terror no mos la iha planu realojamentu ne’ebe mak klaru ba sira

“Rai ne’ebe mak ami hela ba ne’em rai eransa ne’ebe mak ami nia avo sira fo hela mai ami, no rai ne’e rai produtivu tebes, ne’ebe sustenta ami nia vida moris lor-loron nian, se wainhira muda ami sai husi fatin ida ne’e ami la iha ona rai seluk, atu ba hela no la iha ona rai bokur ba ami hodi kuda ami nia produtu hodi bele fo moris lor-loron ba ami,” tenik nia/

Komunidade afetadu sira mos deklara ho klaru katak sira la kontra dezenvolvimentu ne’ebe Timor-Leste atu halo, maibé presiza konsidera sira nia direitu nu’udar na’in ba rai no mos opsaun ne’ebe komunidade sira oferese ba atu bele hari’i sidade universitariu ida ne’e iha rai ho naran Mausadu ho medida hektares 66.

Iha fatin hanesan Diretór Nasional Terras Propriedade (DNTP), Rodrigo Mendonca iha ninia intervensaun hato’o katak DNTP nia papél iha implementasaun ida ne’e mak ezekuta de’it politika VIII Governu nian, katak sidade universitariu ne’e bele hari’I iha Aileu no kona ba deside fatin ne’e ekipa  konjuntu sira mak deside, ho rajaun téknika ida-idak nian halo survey konjuntu ho Ministériu hotu-hotu, mak foin bele deside fatin ida ne’e, husi fatin 3 ne’ebe mak munisípiu prepara.

“Kona ba Direitu ita bo’it sira atu reklama ne’é normal, neé direitu demokratiku ita boot sira nian, maibe rezultadu hahu husi inisiu to’o iha ultimu dokumentus rai nian ka dokumentus sira ne’e imi (komunidade) kaer, no saida mak ema kaer sasan sira ne’e ita tau iha relatoriu ida né’ebe nakloke tebes, no Iha faze 3 ne’ebe mak ita persija atu hare, ne’e mak direitu primaria, direitu sekundaria no ida mak pose sasan sira neé ita sei tau ba meza, no hare’e ba lei para depois ita bele konsidera ita bo’ot sira iha direitu ka lae”, nia haktuir 

Entretantu Advogadu Rede ba Rai husi Jurista Advokasia, Tito Maia hateten katak mekanizmu aprosimasaun sira ne’ebe mak entidade benefisiáriu sira halo, tenke bazeia duni ba Lei Nú 8/2017 ne’ebe define klaru kona ba prosedimentu sira ne’ebe presiza halo tuir, antes atu hasai komunidade sira husi sira nia hela fatin

“Se implementasaun ida ne’e mak la bazea ba Lei, maske estadu ne’e iha poder bo’ot liu maibe estadu ne’e iha lei nia okos, tanba ne’e mak ami husi Rede ba Rai sei nafatin akompaña komunidade sira atu to’o iha ne’ebe deit inklui to’o iha tribunal”, dehan Advogadu Rede ba Rai husi Jurista Advokasia

Sorumutu ida ne’e infelizmente la marka prezensa husi Ministru Ensinu Superior Siensia e Kultura, hodi bele solusiona preokupasaun sira ne’ebe mak komunidade sira liu hosi dialogu refere.

Print Friendly, PDF & Email

LEAVE A REPLY

Please enter your comment!
Please enter your name here