Reportajen Zevonia Vieira
Ministériu Saude (MS) deteta tan kazu pozitivu COVID-19 ba loron 27 Agostu hamutuk 357. Liuhusi komunikadu imprensa, Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, (CIJK-SS), Dr Rui Maria de Araújo relata ba jornalista sira katak kazu foun pozitivu COVID-19 hamutuk 357 (iha Dili 228, Covalima 29, Viqueque 25, Baucau 24, Ainaro 18 & munisipiu seluk hamutuk 33) no kazu obitu ohin nain 2
Husi total kazu detetadu foun ohin mane 188, feto 169, total kazu detetadu foun ohin, hirak ho idade tinan ho idade>60 nain 17, 168 kazus ka 47% maka sintomátiku (hatudu sintomas). Husi kazu detetadu foun ohin, 108 (30%) iha ona vasina kompletu & 40 (11%) hetan ona vasina doze dahuluk.
Kazu rekuperadu iha nain 185, kazu ativu ohin, sae 4.373. Total kazu konfirmadu kumulativu sura husi loron 21 Marsu 2020 to’o ohin loron hamutuk 15.960 no total obitu nain 2, nune’e total obitu sae ba 58.
Total óbitu ne’ebé relata ohin, 27 Agostu 2021 nain 2, ho detalle hanesan tuir mai, mane, idade tinan 78 timoroan, hela iha Dili, seidauk vasina, iha 24 Agostu 2021 diagnóstikadu sindroma insufisiénsia respiratória aguda (SIRA), tanbá Covid-19, no hahú halo tratamentu iha Vera Cruz, iha loron ne’e kedas. Horikalan 19:10 matebian iis-kotu.
Kazu seluk mane idade tinan 58 timoroan, hela iha Munisípiu Bobonaro, seidauk vasina, iha 21 Agostu 2021 diagnóstikadu sindroma insufisiénsia respiratória aguda (SIRA) tanbá Covid-19, no hahú halo tratamentu iha Lahane, iha loron ne’e kedas. Horikalan 19:10 matebian iis-kotu.
