Reportajen David da Costa Gusmao
Administradór Munisípiu Ainaro, Leo Vazílio Amaral Pereira deklara katak durante governu dekreta Serka Sanitáriu (SS), Konfinamentu Obrigatoriu (KO) halo povu Ainaru moris iha difisil, no susar atu hetan ai-han no osan.
“Pandamia Covid-19 ne’ebé afeta ba komunidade munisípiu Ainaru durante fulan hirak liu ba komunidade moris iha tempu difisil tebes iha aspetu ekonomia tanba estadu dekreta serka sanitariu, konfinamentu obrgatoriu iha ambitu estadu emerjensia nia laran susar tebes atu hetan -ai-han no osan”, dehan nia ba PR Lú Olo bainhira partisipa iha Dialogu iha Salaun Parokiál Ainaru, kinta 19/11.
Nia salienta maibé dezafiu hirak ne’ e komunidade Ainaru ultrapasa liuhusi programa governu nian hanesan agregadu familiar, no sesta bazika hodi hakbiit povu nia moris lor-loron, nune’e mós situasaun balun ne’ebé akontese iha fulan Setembru nia laran, ne’ebé hamate ema kuaze 152 ne’ebé deskonfia moras Covid-19
“Situasaun sira iha leten halo povu panik maibé hanesan governu lokal, ami enkoroja povu atu bele partisipa iha vasina atu bele livre husi situasaun serteja iha leten, maibé informasaun falsa barak mak sirkula iha média sosial hodi afeta numeru vasinasaun menus tebes”, nia dehan.
Nia esplilaka ikus mai governu sentrál ne’ebé lidera husi Primeiru Ministru Taur Matan Ruak, hodi mobiliza membru governu sira tun mai iha baze hodi halo advokasia ba ita-nia komunimidade hodi partisipa iha vasina e agora munisípiu Ainaru atinje ona vasina 7.4%
Hatan ba preokupasaun ne’e, Prezidente Repúblika, Dr. Francisco Guterres Lú Olo hatete horiseik, 18 Novembru, iha oras tuku 15.00, nia promulga Dekretu Parlamentu Nasionál númeru 53/V husi Parlamentu Nasionál kona-ba alterasaun dahuluk ba Lei númeru 10/2004, Lei Sistema Saúde, no aprova medidas esesionais no temporárias hodi hatán vijilánsia sanitária ba pandemia moras Covid-19.
Promulgasaun alterasaun dahuluk ba Lei Sistema Saúde bele ona aplika restrisaun balun ba ema nia direitus atu proteje saúde públika. Tanba ne’e estadu la presiza ona implementa estadu emerjénsia.
“Agora ne’e serka sanitariu la iha ona, konfinamentu obrigatóriu no estadu emerjensia laiha ona, importante liu mak ita tenke vasina para ita-nia imunidade forte”, esplika PR.
Nune’e vasina to’o pursentu 70-80 ne’e Timor-Leste bele livre ona hodi hala’o atividade.
