Home Notisia Joven Agrikultura: Polítika Governu La Sensivel, Presiza Tau Prioridade Ba Joven Produtivu

Joven Agrikultura: Polítika Governu La Sensivel, Presiza Tau Prioridade Ba Joven Produtivu

345
0
Responsavel Ermera Ai-kulat orgániku, Januario Goncalves. [Foto: Zevonia | 10.12.2021]

Reportajen Silvino Freitas

Investimentu governu nian la tau prioridade ba joven produtivu sira, ne’ebe mak konsege kria serbisu ba an rasik, nune’e grupu joven produtivu sira ezije ba governu hodi investe boot iha setór produtivu sira.

Liuhusi media briefing ne’ebe organiza husi Koligasaun Agrikultura, iha media center HASATIL, Responsavel Ermera Ai-kulat orgániku ba jornalista sira hateten joven sai fatór importante ba nasaun, maibe kuaze investimentu governu nian ita haree hanesan matan-delek.

“Timor hanesan nasaun ne’ebé mak foin ukun-an, presiza investe iha setór agrikultura, no mós setór importante ne’ebé mak bele kontribui ba dezenvolvimentu” dehan Januario Goncalves ba jornalista sira iha sede HASATIL, Farol, (10/11).

Nia dehan polítika governu nian ne’ebé hateten, ba joven sira tenke kreativu, maibé Orsamentu Jeral Estadu ne’ebé mak tau iha kapitál dezenvolvimentu ne’e ki’ik liu, kompara ho transferénsia publika.

“Joven kontinua mantein kreativu maibe polítika governu nian mak la sensivel, oin-nusa mak atu muda setór agrikultura ne’e sai setór ida ne’ebé mak kontribui ba dezenvolvimentu, hare husi parte seluk iha tinan 2015 Primeiru Ministru, Rui Araújo asina Objetivu Dezenvolvimentu Sustentável (ODS), to’o 2030 Timor-Leste tenke atinje setór sira hotu ne’ebé mak iha ODS nia laran, liu-liu iha númeru 17”, nia haktuir.

Nia dehan governu hatene mina sei maran, atu investe iha setór agrikultura ne’e nafatin menus, orsamentu ne’ebé mak aloka ba setór agrikultura menus liu kompara ho transferénsia publika.

“Ami nia problema atuál mak fatin, ami presiza rai hektar ida ka rua, atu nune ami bele investe, maibe la iha ema ne’ebé mak ho vizaun di’ak, ita husu de’it rai atu aluga mos la iha dalan, ne’e hatudu katak ita rasik mak impede joven nia kriatividade sira”, nia tenik.

Nia rekomenda ba governu tenke konsentra iha dezenvolvimentu setór produtivu, tanba durante pandemia de’it joven iha kriatividade barak los, hodi hein governu nia investmentu maibe ikus mai governu aloka orsamentu porsentu boot liu iha transferénsia publika kompara ho kapitál dezenvolvimentu.

Print Friendly, PDF & Email

LEAVE A REPLY

Please enter your comment!
Please enter your name here