Reportajen Adroaldo ‘Saretukau’
Seguransa Polísia Nasional Timor-Leste (PNTL) la autoriza komunidade sira ne’ebé defende sira nia direitu ba rai hodi harii sidade universitáriu atu partisipa iha serimónia lansamentu plaka sidade universitáriu hosi Primeiru Ministru Taur Matan Ruak, iha Suku Bandudato, ohin 21, Dezembru.
Ho asaun PNTL nian, Elsa Xavier nu’udar vítima ne’ebé atu partisipa sermónia lansamentu fatuk dahuluk ba projetu sidade universitáriu, hakarak fo sai ba públiku, liu-liu PNTL Munisípiu Aileu nia servisu.
Nia hatete hanesan sidadaun bai-bain ida hakarak atu partisipa Primeiru Ministru ne’ebé ohin mai atu realiza primeira pedra konabá sidade universitáriu ba rai ne’ebé mak maluk sira seluk ne’ebé simu ona indimnizasaun ho sira nia área luan 6 hektare.
“Ha’u sente triste hanesan timoroan, ohin ha’u fila ha’u atu tanis, tanba ha’u hanesan timoroan ida, ha’u atu tama sira trankadu, la fo ha’u tama, sira dehan, mana ami labele fo mana tama, ha’u dehan, tanba sa? Ha’u sidadaun Timor, imi la fo ha’u tama, sira dehan lae! Ne’e orientasaun hosi ami nia komandante Aileu nian”, nia lamenta ho atitude seguransa PNTL durante lansamentu.
Nia hatutan katak governu ida ukun ne’e failansu, governu nunka mais iha fuan hanoin povu ne’e, ita haree sira mai ho obrigatoriamente fali, realidade mak ohin hatudu ne’e, ita tama mos labele, ami sente hanesan ami ne’e la’os rai ida ne’e nia oan, ami hanesan fali sidadaun estranjeiru.
Iha parte sorin ho asaun refere, ba jornalista sira Komandante jeral Munisípiu Aileu Jorge Monteiro hatete, los duni katak konvidadu sira hosi Aileu oan sira liu-liu komunidade sira iha Suku Bandudato no Lau-usi, maibé nia hato’o hakarak asegura de’it asaun sira hodi labele prejudika aktividade ne’e.
“Ami hosi uma ba uma konvida ema hotu-hotu partisipa sermónia lansamentu ida ne’e, maibé la autoriza hala’o kualker aktividade sira selu-seluk, hanesan dada panfletu ka spanduk, ne’ebé la tama ba programa lansamentu ida ne’e”, Komandante Jorge hatete.
