Reportajen Adroaldo ‘Saretukau’
Estadus Unidus Amérika (EUA), Sábadu, 12 Fevereiru, haruka tan doze adisionál vasina Pfizer hamutuk 100,620 ne’ebé EUA disponibiliza ona ba Timor-Leste, iha ne’ebé sei uza ba vasina labarik ho idade 12 to’o 18, nomos ba vasina booster nian. Doze vasina hirak ne’e to’o liu hosi COVAX no koordena ho UNICEF, simu direita hosi Embaixada EUA nia Enkaregadu Negósiu Tom Daley, iha Aeroportu Internasional Prezidente Nicolau Lobato, Díli.
Iha xegada vasina Pfizer ne’e, Enkaregadu Negósiu Tom Daley kontente ho prezensa hotu-hotu nian hodi akompaña simu vasina Pfizer ne’ebé to’o tan ona mai Timor-Leste hosi EUA.
“Ha’u kontete ho ita boot sira hotu nia prezensa iha ne’e, konabá ohin mai simu xegada vasina Pfizer, liu hosi inisiativa COVAX, haruka hosi Estadus Unidus Amérika mai Timor-Leste. Ami kontente tebes halo parseria ho UNICEF no Governu Timor-Leste hodi ajuda kombate pandemia COVID-19 no hakotu pandemia ida ne’e iha Timor-Leste,” hatene Enkaregadu Tom ba jornalista sira iha Aeroportu Internasional Nicolau Lobato, 12/01.
Ida ne’e hanesan parte ida hosi sira nia komprimísiu hodi oferese vasina ba Timor-Leste, ne’ebé sura hamutuk to’o agora ho total rihun 200 resin ona hodi ajuda kombate COVID-19 iha Timor-Leste, Tom Daley dehan.
Konabá kazu Omicron ne’ebé oras ne’e rejista iha Timor-Leste, nia hato’o, sei halo saída mak hanesan sira halo ona hodi kombate COVID-19 iha Timor-Leste.
“Ami enkoraja populasaun Timor-Leste atu kontinua nafatin kumpri medida atu kombate COVID-19 hanesan tau maskra, fase liman nomos simu vasina kompletu, se for presizu simu mos vasina booster, hodi kombate variante ida ne’e, hanesan mos variante sira seluk,” hatete Enkaregadu Negósiu EUA iha Timor-Leste, Tom Daley.
Nia hatutan apoiu ne’ebé fo ba Timor-Leste ne’e, hodi reforsa liu tan kapasidade Governu nian hodi bele kombate COVID-19.
Iha parte sorin, Diretor Aprovizionamentu Servisu Autónomu Medikamentu no Ekipamentu Saúde (SAMES), Nelson da Costa Correia, hatete armazenamentu SAMES nian iha preparasaun ne’ebé di’ak antes vasina Pfizer mai, nia hatete sira investe osan liu hosi UNICEF hodi sosa jeleira USV ne’ebé instala ona iha SAMES.
“Iha rejional ita iha planu para semana oin, halo instalasaun iha munisípiu Baucau, Maliana ho Ainaro. RAEOA mos ita prevé hotu iha ne’e, maibé tuir informasaun, konstrusaun ba jeleira nian seidauk iha, maibé felizmente ita nia kondisaun di’ak ba simu sasan sira ne’e,” hatete Diretor Aprovizionamentu SAMES, Nelson.
Governu EUA apoiu ona vasina mai Timor-Leste ba dala tolu, hahú hosi tinan 2021 liu ba.
