Reportajen Umbelina dos Reis
Sekretária Jerál Partidu FRETILIN Dr. Mari Bin Amude Alkatiri hatete iha konferénsia nasionál Organização Popular Mulher de Timor (OPMT) ba dala haat, katak OPMT ida agora ne’e la haneaan ona OPMT ida uluk iha tinan 1974 ho 1975, tanba ne’e nia fiar OPMT sei iha kompleksidade hodi haree ba futuru, liu-liu enkoraja feto nia partisipasaun iha karreira nu’udar líder ida, ba valores disiplina nian uluk mai ohin loron.
Nia hatete OPMT ida agora da-dauk ne’e la hanesan OPMT ke moris fila-fali iha tinan 2006 iha momentu Sekretária jeral saudoza Merita Leite, tanba ne’e nia fiar katak iha konferénsia nasional ida ne’e, sei diskute kle’an liu tan kompleksidade OPMT nian ba futuru.
“Se la brani susar tebes delegada sira mai hosi Postu Administrativu, Munisípiu, RAEOA, tuur hamutuk iha ne’e, tenke mai ho vontade ida deit atu lori CNRT hateke ba oin, tanba ha’u loro-loron hanoin de’it mak CNRT, CNRT hakarak saída? Atu lori OPMT hateke ba oin,” hatete Sekretária Jeral Partidu FRETILIN, Dr. Mari Alkatiri, iha Salaun Kaderal, 11/02.
Nia hatete, agora ita hala’o konferénsia ida ne’e tempu importante tebes distinge instituisaun ho ema nia disiplina rasik, ho valores prinsípiu rasik no vida kultural rasik. OPMT tenke hatene ida ne’e, OPMT masa FRETILIN nian, ha’u ko’alia ida ne’e tanba eleisaun prezidensiál konkluzaun barak.
Nia hatutan tan, uluk kedas ha’u dehan ita boot sira mai husi foho, ne’e tuur hamutuk hodi fo opiniaun ida mai ha’u, ha’u asume responsabilidade instituisional, la’os idade jerasaun polítiku, polítiku bele lori valor akresentadu para atu dudu organizasaun ba oin.
“OPMT moris iha 1975, organizasaun karakter úniku tanba la’os hader, FRETILIN hahú organizasaun tolu OPMT, OPJT, OTT, orgazisaun rua ne’e fahe ba pedasu-pedasuk, OPMT mesak, OPMT to’o fin, i OPMT ida ne’e hamriik metin hodi servi ba direitu feto nian,” nia afirma iha Salaun Kaderal, 11/02.
Ikus nia enkoraja feto sira ba eleisaun suku, tuir mai, “ha’u hakarak haree feto barak mak kandidata aan ba Xefe Suku, ha’u sei fo apoiu, tanba ne’e Kamarada sira bainhira OPMT fila fali ba nia tempu, bainhira presija kaer kilat karik, bainhira halo klandestina ka halo saída de’it, tamba feto iha Timor mos matenek, tanba feto iha Timor mos bele, ita hotu bele,” nia hakotu.
