Home Notisia CEPAD Organiza Konferénsia Ba Validasaun Ezbosu Lei Liberdade ba Informasaun

CEPAD Organiza Konferénsia Ba Validasaun Ezbosu Lei Liberdade ba Informasaun

115
0
halo diskusaun grupu konaba esbosu Lei liberdade asesu informasaun. [Foto: Media CEPAD | 24.01.2023]

Reportajen Santina Lucia da Costa

CEPAD Hamutuk ho Grupu Traballu Nasional realiza Konferensia ba Validasaun Ezbosu Lei Liberdade Asesu ba Informasaun ho Membru Governu, Funsionariu Publiku, Sosiedade Sivil, Lider Komunitariu, Estudantes Universitarius, Lider Relijiosa, Jornalista molok aprezenta ba Parlamentu Nasional (PN) iha Salaun Novu Turizmu, Lecidere, Dili.

Hafoin finaliza konsultasaun iha nivel Munisipiu, CEPAD kontinua organiza Validasaun Nasional hodi rona no apresia partisipantes husi setór oioin, sira nia parser kona-ba Ezbosu Lei Asesu ba Informasaun molok aprezenta ba Parlamentu Nasional.

Iha ambito Konferensia ne’e, Diretór Ezekutivu CEPAD, João Boavida, hateten, Projetu ne’e hala’o  tinan rua resin ona, iha ne’ebé ita kobre Postu-Administrativu 32, Munisipiu 13 inklui RAEOA, ho Estudantes Universitariu, Eskola Sekundaria husi Ensinu Naun-Formal iha Timor laran tomak, ho mós Funsionariu publikus iha Dili.

”Ohin loron ita mai validasaun, maibé validasaun ida ne’e oin seluk uituan tanba projetu ne’e hala’o ho objetivu atu koñesimentu publiku nian kona-ba sira nia direitu konstituisional atu hatene ho bazé artigo 40 K-RDTL nian. Ho mós bazé iha vontade Governante sira nian ne’ebe determina liña Ministeriais atu servisu hamutuk ho CEPAD atu nune’e hakbi’it sira nia obrigasaun atu kumpri, bainhira sidadaun sira husu informasaun ruma.” Dehan, Diretóra Ezekutiva CEPAD, João Boavida iha Salaun Novu Turizmu, Licidere, loron 24/1/2022.

Diretór Ezekutiva CEPAD, esplika, Hafoin hala’o prosesu tomak ne’e, nia rezultadu final mak ne’e de’it, katak atu hamosu nota politiku ida hodi taka projetu ne’e, maibé molok to’o rohan projetu iha fulan Novembru tinan kotuk, Governante sira inklui Ezekutivu, membru Governu, membru Parlamentu Nasional nian, sira husu katak, nusa mak CEPAD la foti inisiativa ida hodi reviziu esbosu projetu lei ba Liberdade Asesu Informasaun, ida ne’e pedidu ida mosu iha projetu rohan ne’e.

João Boavida, hatutan, hodi akomoda fali Nai-Ulun sira nian no komunidade sira ne’ebé tur hamutuk iha Postu-Administrativu 32 nia hakarak, entaun hanaruk tan projetu ne’e ba fulan 6, nune’e bele hatan ba hakarak ne’ebé Governante hato’o, mak atu hamosu esbozu projetu lei ba Liberdade asesu informasaun. Ida ne’e lori ohin loron ita mai tur hamutuk iha ne’e atu valida de’it ninia subtansia ne’ebé Konsultór tau hamutuk ho ekipa teknika CEPAD.

Nia akresenta, Lei Liberdade Asesu Informasaun ne’e importante tebes, entermus de komponente baziku ida demokrasia nian atu permite sidadaun sira partisipa ativamente no proativamente iha prosesu demokratizasaun tomak no Governasaun tomak.

“Ohin loron ne’e, ita nia publiku nafatin indiferente ba situasaun politika rai-laran, tanba sira seidauk sente benefisiu ekonomiku husi situasaun husi independensia politika ohin loron. Ida Seluk tanba laiha interese atu hatene, tanba benefisiu ne’ebé sira seidauk hetan halo sira lao tuir dalan sira nia rasik hodi sobrevive iha situasaun sosiu-ekonomika ne’ebé ohin loron ita moris.” Hateten, João Boavida.

Nia realsa, lei ida ne’e ninia objetivu final mak atu insita, enkoraja, promove partisipasaun sidadaun sira nian iha prosesu politiku tomak atu nune’e ajuda tulun fali Governante sira atu sai transparente, akontavél, responsavél ba buat sira ne’ebé halo no politika publika ruma mak sira hamosu karik tenki traduz ba realidade no traduz ba hadia povu nia moris iha bazé.

Partisipante ba Konferensia ne’e mai husi, Membru Governu, Funsionariu Publiku, Sosiedade Sivil, Membru Grupu Traballu Nasional ba Liberdade Asesu ba Informasaun, Lider Komunitariu, Estudantes Universitarius, Lider Relijiosa, Jornalista no seluk tan.

Atividade  ne’e realiza tanba hetan apoiu husi Uniaun Europea (EU) no implementa husi CEPAD.

Print Friendly, PDF & Email

LEAVE A REPLY

Please enter your comment!
Please enter your name here