Reportajen Umbelina dos Reis
Komunidade Aldeia Fatuk Francisco, Suku Camea Postu Administrativu Kristu Rei sempre afeta inundasaun bainhira tempu udan, no sedauk iha solusaun hodi responde ba situasaun ne’e, hodi konstroi bee dalan ka valeta nune’e labele mosu inundasaun iha tempu udan.
Komunidade aldeia Fatuk Franscsco, Nilton da Cruz, nu’udar mos estudante universitáriu UNTL, sente triste tebes tanba tempu udan sempre hetan inundasaun no bee tama uma, maibe governu nunka tau matan hodi hadi’a ba bee dalan no valeta.
Nia dehan udan ne’ebé akontese iha loron 21 to’o mai agora ne’e, halo sira trauma no bee sa’e hela de’it tanba bé dalan laiha.
“Aldeia Fatuk Francisco mos agora enfrenta hela ba bee moos, bai-bain bee laiha ne’e ami kuru bee iha mota laran de’it, maibé udan ona entaun ami pasiénsia tuur iha uma de’it, agora ami presiza tebes tulun husi governu hodi tau matan netik mai ami komunidade Becora liu-liu aldeia Fatuk Francisco,” Nilton husu atu governu bele haree besik sira nia situasaun hodi rezolve problema hirak ne’e.
