Reportajen Silvino Freitas
Hafoin anunsia rezultadu estudante admitidu ba Universidade Nasional Timor Lorosae (UNTL) ho total 6007 no Institutu Politéknika Betanu(IPB) 345, Reitór UNTL, Joao Martins sente preokupadu ho númeru estudante ne’ebé MESSK atribui liu tiha proposta, ne’ebé sira hato’o ba Ministeriu.
“Vagas ne’ebé mai iha UNTL boot liu numeru ne’ebé ami sempre komunika ho públiku, ami nia proposta inisiál ne’ebé hetan konkordánsia hamutuk 4100, mais ohin rezultadu anúnsiu formal iha 6007 pesoal, ida ne’e numeru ida boot tebes” dehan Reitór UNTL iha Fundasaun-Oriente,(25/02).
Tuir nia ho numeru ne’ebé boot ,sei tau mos problema, impedimentu no dezafiu ba iha prosesu de ensinu tanba iha fakuldade balun infraestrutura seidauk iha, fakuldade ekonomia no enjeñaria mak diak oituan, tanba edifisiu foun maibé restante ne’e sei hasoru problema boot tanba numeru estudante ne’ebé barak.
“Ohin hau koalia ona informalmente ho Ministru para tau atensaun kestaun ne’e hodi ajuda hadia infraestrutura iha UNTL, liu liu apoiu orsamentu tan mai UNTL atu konstroe tan edifisiu foun ba tinan oin atu ajuda prosesu ensinu lao ho diak, implika mos ba rekursu umanu tamba numeiru professores tenki aumenta ne’e problema uituan maibe tamba ne’e unika universidade publika ho desizaun governo nian ami labele kontra” nia dehan.
Iha fatin hanesan Prezidente IPB, Acacio Cardozo mos hateten tuir esperiénsia kada tinan IPB simu estudante menus husi 300 maibé tinan ne’e iha diferensa uituan.
“Maske ami la iha fasilidade laboratóriu, maibe ami nia estudante sira sempre ba iha sentru formasaun sira ne’ebé ami halo kooperasaun hodi halo pratika, iha kampus laran iha ona, maibe seidauk sufisiente maibé kona ba dosente ami la iha problema tanba dosente maioria mestradu” nia konklui.
