Reportajen Santina Lucia da Costa
Komunidade iha Fleixa Postu Administrativu Maubessi, Munisipiu Ainaro rekomenda ba Kandidatu Prezidente Republika ho Númeru Sorteiu 12, Virgilio da Silva Guterres “Lamukan” bainhira eleitu ba Prezidente Repúblika tinan 2022-2027, tenki tau matan ba oan ki’ak sira, feto faluk no agrikultór sira iha Fleixa, hodi asesu ba estrada nune’e lori produtu ba merkadu
Rekomendasaun ne’e hato’o husi Komunidade Fleixa, Bendito da Conceiҫão Barros ba kandidatu Prezidente Repúblika, Virgilio da Silva Guterres “Lamukan” wainhira kandidatu ho nia ekipa fahe hela boletín no poster ba komunidade sira iha Fleixa, loron Kinta, 10/3.
Bendito da Conceiҫão Barros hateten, sentimentu hanesan aileba orgullu bainhira kandidatu Prezidente Republika ho númeru sorteiu 12, Virgilio da Silva Guterres “Lamukan” to’o iha sira nia fatin.
Bendito da Conceiҫão Barros, dehan karik kandidatu Prezidente Republika, Virgilio da Silva Guterres “Lamukan” eleitu ba Prezidente Republika tinan 2022-2027 maka tenki tau matan estrada, hodi nune’e komunidade sira bele asesu hodi fa’an sira nia produtu ba merkadu.
“Rekomenda ba kandidatu Prezidente Repúblika hanesan aileba, hanesan ema foinsa’e atu liberta rai ida ne’e ita mós tenki iha aman ida ne’ebé mak di’ak iha nasaun RDTL, karik kandidatu PR eleitu iha PR tenki haree oan ki’ak feto faluk no Maubissi oan sira moris liu ba agrikultór, kuda modo, mais difisil tebes para atu ema mai foti tanba estrada ladi’ak, mezmu la tau aspal maibé tenki atiru di’ak hodi nune’e ami bele la’o.” Sujere, Bendito da Conceiҫão Barros, iha Fleixa, Maubessi, Ainaro.
Nia mós husu ba komunidade iha Postu Administrativu Maubessi tenki hili Prezidente Republika ne’ebé koñese ita, no besik liu ba ita hanesan kandidatu Prezidente Republika, Virgilio da Silva Guterres “Lamukan” to’o kedas ita nia fatin. Hanesan Maubessi oan ita fiar malu mak iha loron 19 Marsu 2022 keta haluha hili númeru sorteiu 12.
