Reportajen Santina Lucia da Costa
Kandidatu Prezidente Republika ho Númeru sorteiu 12, Virgilio da Silva Guterres “Lamukan” ho nia komprimisu politika, bainhira eleitu ba Prezidente Republika tinan 2022-2027 tenki sai matan, tilun no ibun ba nia povu no la subar-an iha Aitarak-Laran.
Iha ambitu Kampaña ho tipu dialogu komunitária, kandidatu Prezidente Republika, Virgilio da Silva Guterres “Lamukan”, hateten sai Prezidente tenki sai matan, tilun no ibun ba nia povu, matan atu haree nia povu.
“Sai Prezidente tenki sai matan, tilun no ibun ba nia povu, matan atu haree nia povu ne’e moris di’ak ka lae, moris iha Dili ho Maubessi hanesan ka lae, eskola iha Maubessi ne’e hanesan ka lae eskola iha Dili, eskola iha Maubessi ne’e meza, kadeira, no professor sira nia kondisaun hanesan ho eskola iha Dili ka lae, labele iha Dili de’it mak iha fasilidade, iha Maubessi laiha.” hateten, Kandidatu PR, Virgilio da Silva Guterres “Lamukan”, iha Aldeia Lekitehi, Suku Maubessi, Postu Administrativu Maubessi, Munisipiu Ainaro, 9/3.
Kandidatu PR ho númeru sorteiu 12, hatutan sai Prezidente Republika brani koalia, atu hatete ba governu dezenvolvimentu ida ne’e ninia foku, ninia hun ne’e tenki di’ak ba povu la’os lori di’ak ba governante sira de’it, la’os governante de’it iha uma di’ak , uma andar, kareta foun maibé povu kontinua moris ki’ak tinan 20 ona.
Lamukan dehan ita ukun-an tinan 20 ona, orsamentu tinan-tinan aumenta mais ita la haree ninia rezultadu, ninia impaktu ne’e saida. povu kontinua sai vitima ba prosesu dezenvolvimentu.
Lamukan realsa, tenki hamriik hakilar natoon ona povu terus tinan 24 ona iha Indonesia nia okos, agora povu iha direitu atu goza moris di’ak, la’os tinan-tinan iha Governu, Parlamentu lori povu nia naran transmisaun direita iha televizaun dehan lori povu maubere nia naran, orsamentu promulga haluha tiha povu maubere.
“Hau kompremete ba eleitores sira bainhira hili hau sai Prezidente Republika, hau sei la subar-an de’it iha Aitarak-Laran, hau sei sai, la’os sai ba tasi balun liur ne’eba, Timor nia imajen iha liur di’ak hela, timor sai naroman ba rai balun iha liur atu hetan Independensia, Timor sai ezemplu ba povu balun iha rai liur atu hetan independensia, hau Prezidente la’os Ministru Estranjeirus.” dehan, Lamukan.
Nia hateten, obrigasaun nu’udar Prezidente Republika atu muda imajen estadu ida ne’e perante iha ninia povu nia oin, tanba tinan 20 ne’e, estadu ida ne’e ninia dignidade nia oin, estadu ida ne’e hanesan buat aat ida iha povu nia oin. Hakarak fó imajen katak, estadu ida ne’e iha atu serbi duni povu ida ne’e, tanba hanoin simples, povu mak harii povu la’os estadu mak harii povu.
Nia Subliña, sai Prezidente Republika la’os sai travaun ba governu maibé hanesan kareta karik tenki sai trasaun rotóra tama tahu laran labele Prezidente tenki ajuda. Sai travaun atu defende dignidade povu ida ne’e nian, atu lori moris di’ak ba povu ida ne’e bele, mais sai travaun atu hatudu de’it arogansia politika ne’e la’os funsaun Prezidente nian.
