Reportajen Santina Lucia da Costa
Kandidatu Prezidente Republika ho Númeru sorteiu 12, Virgilio da Silva Guterres “Lamukan” hala’o Kampaña ba dala-ualu (8) ho tipu dialogu ho nia eleitor sira iha Mantane, Postu Administrativu Aileu Villa. Nia dehan hakarak harii sidade universitáriu buka fatin mamuk seluk, la’os mai hadau povu nia fatin moris nian. Duni sai komunidade husi nia fatin la’os dezenvolvimentu armoniozu no integradu.
Iha dialogu ne’e, Kandidatu Prezidente Republika, Virgilio da Silva Guterres “Lamukan”, hateten Aileu sai vitima ba dezenvolvimentu selvajen la’os dezenvolvimentu armoniozu integradu hanesan ita nia konstituisaun haruka iha artigu 6, duni sai komunidade husi nia fatin la’os dezenvolvimentu armoniozu no integradu, atu sai prezidente ka lae sei nafatin hamriik ho imi.
“Karik hau eleitu Prezidente ba Aitarak-Laran, karik iha dokumentu ruma hau tenki asina, primeiru dokumentu hau asina ba governu ba mak husu atu para projetu sidade universitariu iha Bandatu, Aileu Vila. Hau sai Prezidente hau lakohi haree instituisaun ida lori militar no polisia ba ameasa komunidade atu sai husi sira nia fatin.” komprimisu, Kandidatu Pezidente Republika, Virgilio da Silva Guterres “Lamukan”, iha Mantane, Munisipiu Aileu, 9/3.
Lamukan dehan Prezidente Repúblika nia funsaun tolu mak, tenki sai matan povu nian atu haree realidade sosial, tinan 20 ona osan sira fakar millões ne’e ba iha ne’ebé, povu balun sentru saude seidauk iha, povu eskola kadeira seidauk iha, bee-moos laiha, Prezidente Republika iha kapasidade atu haree situasaun ida ne’e.
Lamukan hatutan Prezidente Republika mós iha kapasidade atu rona, rona nia povu, rona partidu politiku sira, rona povu nia halerik, no ikus Prezidente Republika tenki rona povu nia ibun, atu hato’o ba governu, justisa, Parlamentu, katak, povu Aileu komunidade iha Bandatu Mantane ninia rai governu atu foti hodi halo sidade Universitariu, buat ne’ebé laloos, prezidente tenki iha korajen ida ne’e
Lamukan deklara hakarak hamriik ho komunidade Mantane atu hatete ba governu ba sé de’it katak, povu mak harii estadu la’os estadu mak harii povu, ita ema mak harii estadu, entaun estadu ne’e tenki iha atu serbi povu la’os estadu iha atu mai sama fali povu, ida ne’e mak Lamukan hakarak kandidata-an ba Prezidente Republika.
“Hau mai iha ne’e, alende husu imi nia apoiu atu vota ba hau, hau mai mós kompromete hau nia-an, hau sei hamriik ho imi atu hatete lae ba sé de’it, lae ba governu, hakarak harii sidade universitariu buka fatin mamuk seluk la’os mai hadau povu nia fatin moris ninian.” realsa, Lamukan.
Nia akresenta entaun mai atu hasai komunidade tenki komunika, aprosimasaun estadu ho governu nian ba populasaun labele legalistiku tenki aproximasaun politika, aproxima bazeia ba sensu komun, Fraternidade, haree katak komunidade ne’e ema la’os iha eleisaun de’it mak ita konsidera sira nia votus importante, eleisaun hotu tiha ita ba duni sira sai husi sira nia fatin.
