Reportajen Silvino Freitas
Kampaña eleisaun prezidensiál 2022-2027, kaliber nasionál sira aproveita palku kampaña hodi insulta malu no konta istória pasadu.
Tuir Diretór Ezekutivu HAK Sisto dos Santos hateten figura kaliber nasionál uza palku kampaiña hodi hasai liafuan ne’ebé la favorese ba públiku liga ho Paktu Unidade Nasionál ne’ebé halo tiha ona.
“Durante kampaña ita lider sira la konsentra ba programa durante tinan lima ne’ebé prezidente atu halo, maibé palku ida ne’e sira uza fali ba sadere sira nia istoria pasadu nune sira haluha tiha atu koalia polítika saida mak sira atu halo, karik eleitu ba Prezidente Repúblika 2022-2027, sira haluha tiha atu temi ida ne’e palku leten” dehan Sisto liu hosi konferénsia imprensa iha HAK Farol,(15/03).
Nia mos observa katak, dezde hahú kampaña ne’e too daudaun ne’e laiha mudansa signifikante maibe nafatin hatudu sira nia hahalok insulta malu, hodi foku fali ba sira nia istória pasadu hodi halo sosiedade sai konfunde liu tan.
“Povu iha konfuzaun nia laran, dezde dia 04 hamosu provokasaun ne’ebé nakloke uza palku hodi insulta malu hodi hamosu fali reasaun husi apoiante adversariu sira, HAK preokupa tebes hahalok ida ne’e liga ho paktu unidade nasional atu kria amizade iha festa demokrasia ida ne’e” nia preokupa.
Nia dehan tan katak husi hahalok insulta malu ne’e hamosu provokasaun, hodi rezulta ona ema lakon vida hanesan akontese iha munisípiu Baucau no problema seluk akontese iha munisípiu Viqueque, moralmente ita nia kaliber sira la preokupa ho ida ne’e.
“HAK kestiona sira laiha seriedade ba povu maibe ba fali sira nian an de’it, nunee antes sira atu hakat ba ai-tarak laran sira kuda tiha hela ai-tarak iha sosiedade nia leet, ida ne’e maka Prezidente atu kuda dame ka atu soran povu ida ne’e, HAK lamentavel ho ida ne’e” nia konklui.
