Reportajen Silvino Freitas
Prezidente Partido Libertasaun Popular(PLP), Taur Mata Ruak(TMR) fo parabens ba militante PLP ne’ebé nafatin tuir nia hodi fo konfiansa tomak, nia espera militante sira sei la soe nia iha dalan.
“Iha instituisaun ida nia laran iha interese tolu mak lao hamutuk ida mak grupu nian, ida nasaun nian no ida fali mak ema nian, atu interese sira nee iha harmonia presiza tenki jere diak, maibe kuandu tau fali interese pessoal iha nasaun no grupu nia leten mak susar atu lao hamutuk, tamba ne’e hau parabens ita boot sira ne’ebé kontinua firme lao ho hau” dehan TMR iha Konferensia PLP iha salaun-Canossa has-laran,(27/03).
Nia hatutan iha mos militante balun ne’ebé mak sai ona husi PLP, diak liu sira sai tanba sira nia isin iha PLP maibe klamar badiu iha partidu seluk, nune hosi tempu hotu ita purifika ida ne’ebé laran mos, laran diak no tau interese nasaun nian mak bele inklui nafatin iha partidu laran.
“Sira ne’ebé loko-an, vaidozu no gaba-an tau nia interese boot liu sei katik sai hotu, tamba ne’e hau husu obrigado ba imi, imi mos rona iha momentu ne’ebá hau dehan liafuan ida, hau mai ho imi ne’e, hanesan hau bunu-diri, eis-jeneral eis-prezidente mai ho imi esperensia partido laiha, tamba saida hau la ba FRETILIN no CNRT mai fali ho imi tanba hau brani no imi vale duni” nia dehan.
Nia dehan tan, uluk iha funu nia iha esperensia rua ida mak tama ho soke de’it no ida fali tama hodi hamaus, depois soke dala ida mak haree took maibe nia sei la koko militante PLP hanesan esperensia ne’ebé iha tamba mesak matenek.
“Alin-laek dehan maun Taur ba fali CNRT, nia iha ne’e ka lae, halai tiha ona ka, nia uluk iha ai-laran hau mak ukun nia mai fali nia mak ukun fali hau, nia orbaira gaba-an dehan matan-ruak sae palku hau mos sae, kuandu ita kiik ita nia aman nafatin aman no maun nafatin maun” nia konklui.
