Reportajen Joanina Casemiro
Timor-Leste Press Union (TLPU) liuhusi konferénsia imprensa hodi ezije governu kona-ba jornalista Timor-Leste Hamutuk 507 Pesoas, ne’ebé mak durante ne’e seidauk hetan sira direitu hanesan Frontline durante pandemia Covid-19 nian to’o oihn loron.
Iha konferénsia imprensa Sekretariu Jeral TLPU, Zezito da Silva hateten Timor-Leste Press Union (TLPU), nu’udar organizasaun ida ne’ebé fó mahon ba jornalista Timoroan tomak, ho objetivu atu promove no defende direitu jornalista sira nian, bainhira hala’o kna’ar profisionál iha órgaun komunikasaun sosiál nian.
“TLPU la’os organizasaun polítika ida ka la’ós organizasaun komérsiu (naun profit), maibe hanesan mós asosiasaun kontrolu sosiál liu hosi atividade jornalistíka ho prinsípiu krítiku ne’ebé konstrutivu,” Dehan Porta-Voz TLPU ba Jornalista sira iha Jardín 5 de Maiu Kolmera 06/04/22
Nia hatutan organizasaun ne’e atu dezenvolve kapasidade, no kria métodu kontrola sosial ida di’ak no akuntável, hodi partisipa iha prosesu demokrasia no dezenvolvimentu ho prinsípiu ida katak, fó hanoin no fo hatene liu husi kritika ida ne’ebé konstrutiva ho intensaun atu hadi’a hodi servi di’ak liután ba povu no nasaun.
TLPU haree katak direitu frontline jornalista sira nian to’o agora governu seidauk responde, maski Prezidente Repúblika promulga ona dekretu lei númeru 1/2022, 5 Janeiru kona-ba kriasaun subsídiu ba profisionál sira ne’ebé dezenvolve atividade jornalístika.
“Profisionál komunikasaun sosiál sira dezenvolve sira nia atividade jornalístika durante estadu emerjensia ho forma ezemplar, kontribui ativamente ba divulgasaun informasaun kredivél no nesesária Kona-ba prevensaun no kombate pandemia iha teritoriu nasional, ne’ebé mak hamenus ansiedade populasaun Sira nian no prevensaun ba paniku iha Sosiedade, hala’o sira nia dever ho profissional no kontribui ba ema hotu nia di’ak,” nia dehan.
Nia dehan informasaun sira ne ebé divulga husi profissionál sira ne ebé ezerse atividade jornalistiKa kontribui ona, oinsa mak populasaun kumpre regra estadu emerjensia nian, no halo tuir abito ijiene nudar kumprimentu ba protokolu saúde, hodi minimiza no prevene propagasaun husi virus.
“Maibé hafoin TLPU akompaña prosesu tomak, parte sira balun hanesan (Saúde, Autoridade seguransa no seluk tan) ne’ebé konsidera frontline hetan ona sira nia direitu maibe to’o agora direitu jornalista sira nian Governu sedauk fo resposta”, dehan Zezito
TLPU husu ba governu atu konsidera jornalista sira nu’udar frontline hanesan mos ekipa frontline sira seluk, ne’ebé hetan ona suplementu remuneratóriu. Nune’e husu ba Ministériu Finansa atu bele pronunsia buat ruma ba públiku, liu-liu ba jornalista sira nia direitu ne’ebé previstu ona iha dekretu lei.
Tuir kontratu ne’ebe iha katak kada jornalista frontline ne’ebe lista tama ona ba Ministeriu Asuntu Parlamentar no Komunikasaun Sosial (MAPKOMS) katak kada jornalista sie hetan $5.00 kada loron, ne’ebe sura husui fulan Marsu- Dezembru 2022.
