Reportajen Adroaldo “Saretukau”
Padre Selebrante Domingos Maubere, iha nia omilia iha inísiu semana santa Domingu Ramos (Palm Sunday), iha Igreja Sagrado Coração de Jesus (SACROJES) Becora, hato’o ba sarani sira hotu katak, iha eleisaun ne’ebé sei akontese iha 19 Abril mai atu hili ho konsiénsia no hili Prezidente Repúblika (PR) ida ne’ebé haree ba povu hotu-hotu nia moris di’ak.
Padre pároku ne’e husu ba sarani sira atu hili ho fuan no laran atu haree ba Prezidente ida ne’ebé hakuak ema hotu, la’os atu hili prezidente ne’ebé ita nia família, kolega organizasaun ka ema ne’ebé ita koñese iha laran maibé hili Prezidente ida ne’ebé iha hanoin di’ak lori nasaun ba oin.
“Hili la’os ba ita nia família, la’os ba ita nia Partidu, la’os tanba ita koñese, maibé hili ba hotu-hotu nia di’ak,” dehan Padre Maubere iha nia omília ba sarani sira, wainhira selebra misa Domingo Ramos, 10/04.
Entretantu ba inísiu semana santa Domingo Ramos, Padre Maubere hatete “ai-tahan (Ramos) ne’ebé ita kuda, mai hosi fini ne’ebé ita kuda iha Sakramentu Batizmu,” tanba ai-tahan matak ne’e mak ita, nune’e ita presiza banati tuir Na’i nia lia-fuan no hahalok sira hodi moris ba nafatin hanesan ai-tahan ne’ebé buras.
Nia husu mos ba joven sira atu la’o tuir Na’i Jesus nia ain-fatin hodi fo sasin ba nia maluk sira tanba “joven mak unidade, amizade no joven apóstulu ba joven. Joven tenki la’o fo sasin domin ni-nian,” dehan Padre Maubere.
